Serekîya Daîreya Resî, bi amancê ke xizmetê komresî û servîsanê wendekaran ê şaristanî bi hewayêko hîna biemnîyet û biweşî bêrê dayene, bernameyanê xo yê perwerdeyî yê seba şoforan dewam kena. Na çarçewa de goreyê protokolî ke mabênê Şaredarîya Amedî ya Şaristanê Girdî û Odaya Tîcaret û Sanayî ya Amedî (DTSO) de ameyo îmzakerdene, şoforanê sektorê komresî rê perwerdeyê teknîkanê ramitişê biemnîyetî, defansîfî (bingeyê xopawitişî) û ramitişê averşîyayeyî yeno dayene.

Bernameyê perwerdeyî ke 1ê êlule de Salona Kombîyayîşî ya DTSO'yî de dest pêkerd, şoforê otobusanê şaredarîye û servîsan beşdar benê. Perwerdeyê ke do heta 4ê êlule dewam bikerê, hetê Pisporê Teknîkanê Ramitişê Averşîyayeyî Çetîn Buyukçinarî ra yenê dayene.

Şoforan rê perwerdeyê cewabê rastî yê rewşanê talûkeyinan

Bernameyî de ser o qisey bî ke şoforî talûkeyanê trafîkî verê cû ferq bikerê û vera talûkeyanê muhtemelan cewabo rast bidê. Teknîkanê ramitişê biemnîyetî û defansîfî ra teber, muhîmîya kontrolê lezî û talûkeyê lezîya zêde zî şoforan rê yenê îzahkerdene. Ancî derheqê averberdişê hunerê ramitişê şexsî, mesulîyetê ramitişê meslekî û mesulîyetanê şoforan ê xizmetanê komresî de zî agahdarkerdiş yeno kerdene.

Metodê vernîgirewtişê qezayan û kontrolê hêrsî yenê muzakerekerdene

Perwerdeyan de tena babeta teknîkî ya ramitişî ney, sernameyê ke rasterast tesîr kenê hereketanê şoforan ê trafîkî zî yenê muzakerekerdene. Na çarçewa de derheqê metodanê vernîgirewtişê qezayan, kontrolê hêrsî û tesîranê bêhalî û bêhewnîye yê serê emnîyetê ramitişî de agahî yeno dayene. Ancî bi senaryoyanê qezayanê cîyayan ser o, yeno erjnayene ke şoforî rewşanê ke rastê înan yenê, tede ganî senî hereket bikerê.

Mewzûatê trafîkî û mesulîyetê huqûqî yenê îzahkerdene

Çarçewaya bernameyî de şoforan rê derheqê mesulîyetanê huqûqîyan, qeydeyanê trafîkî yê ke vurîyenê û mewzûatê trafîkî yê aktuelî de zî agahî yena dayene. Perwerdeyan de ke bi slaytan yenê kerdene, xusûsê ke ganî şoforî hem seba emnîyetê xo hem seba emnîyetê raywananê wesayîtan hem zî seba emnîyetê şoforan û peyayanê bînan ê trafîkî bala xo bidê ci, yenê neqilkerdene.

Hezar û 200 şoforan rê do perwerde bêro dayene

Çarçewaya bernameyê perwerdeyî de ke do çar rojî dewam bikero, bi giranî hezar û 200 şoforanê komresî rê do perwerde bêro dayene. Bi perwerdeyan yeno amanckerdene ke hişyarîya şoforan a derheqê ramitişê biemnîyet û bihişmendî de bêro zêdekerdene, talûkeyê ke trafîk de eşkenê bibê, verê cû bêrê ferqkerdene û vernîgirewtişê qezayanê muhtemelan rê piştî bêro dayene.