Çarçewaya kampanyaya "Pê keda kolektîfe şaristanê pakî" de ke hetê Şaredarîya Amedî ya Şaristanê Girdî û şaredarîyanê Baglar, Kayapinar, Yenîşehîr û Sûrî ra yena ramitiş, cayanê cîya-cîyayan ê çar qezayanê merkezî de bi beşdarîya hemwelatîyan xebata pakkerdişî ya hîraye ameye kerdiş.

Kampanya ke bi amancê ke Amed bireso cugehêko pak û biweşî û warê cuye yê domdarî bêrê awankerdiş, hetê şaredarîyanê Şaristanê Girdî, Baglar, Kayapinar, Yenîşehîr û Sûrî ra ame destpêkerdiş, dewam kena. Çarçewaya kampanya de ke 10ê tebaxe de Baglar Dortyolî de dest pêkerd, cayanê cîya-cîyayan ê qezayanê merkezî de bi beşdarîya ekîbanê şaredarîye û hemwelatîyan xebatê pakkerdiş û agahdarîye ameyî ramitiş.

Çarçewaya kampanya de keyeyanê komelkîyan ê Taxa Talaytepeyî ya qezaya Kayapinarî de, herêma Teknokentî ya Taxa Yîgît Çawişî ya qezaya Sûrî de, 450 Evler ê qezaya Yenîşehîrî de û Cadeyê Gocmenleran ê qezaya Baglarî de xebata pakkerdişî ameye kerdiş. Çarçewaya xebatan de ke ekîbanê şaredarîye û hemwelatîyan bi hewayêko bikoordîne ramitî, zaf cayan de pakkerdişêko hîra ame kerdiş ke kuçe û cadeyî, parkî, waranê keskî û awanîyê metrukî zî tede yê.

Sekretero Pêroyî yê Şaredarîya Amedî ya Şaristanê Girdî Serdar Bakiroglu û hetkarê sekreterê pêroyî, hemşaredarê şaredarîyanê qezayan, serekê daîreyan, endamê meclîsî û hemwelatî beşdarê xebatanê pakkerdişî bîyî. Xebatan de hemwelatîyan rê derheqê kampanya de broşûrî ameyî vilakerdiş û derheqê amanc û çarçewaya kampanya de agahî ame dayîş.

Çarçewaya kampanya de do heta 21ê tebaxe seranserê şaristanî de xebatê pakkerdiş û agahdarîye bêrê ramitiş. Demê kampanya de yeno amanckerdiş ke beşdarîya komelkî bêra zêdekerdiş û seba şaristanêko pak hişyarîya berpirsîyarîya hempare bêra xurtkerdiş.