Bi serûberkerdişan yeno amanckerdene ke wextê raywanîye bêro kilmkerdene, kapasîteya neqilkerdişî û berhemdarîya seferan bêra zêdekerdene, komres bibo hîna resayox û trafîkê şaristanî bêro rehetkerdene.

Şaredarîya Amedî ya Şaristanê Girdî, bi amancê ke xizmetê komresî yê merkezê şaristanî bibê hîna berdar, domdar û resayox, çarçewaya xebatanê hemparan de ke Unîversîteya Dîcleyî reyde ramena, torra resî de serûberkerdişê neweyî kerdî. Goreyê protokolê hemparîye yê "Optîmîzasyonê Torra Komresî ya Merkezê Şaristanê Amedî" ke serra vîyarte de mabênê Şaredarîya Şaristanê Girdî û unîversîte de ame îmzakerdene, sîstemê komresî yê şaristanî bi metodanê zanistîyan ame analîzkerdene û rewşa mewcûde ya xetr û dingan, giranîya raywanan, wextê raywanîye û kapasîteya neqilkerdişî ameyî erjnayene.

Çarçewaya xebate de ke qezayanê Baxlar, Kayapinar, Sûr û Yenîşehîrî û kampusê Oglakliyî gêna xo mîyan, etudê warî, hûmaritişê raywanan, pêmawitişê wextê raywanîye, analîzê daneyan û falîyetê modelkerdişî ameyî ramitene. Serekîya Daîreya Resî, goreyê daneyanê ke ameyî girewtene, rayîr, hûmara wesayîtan û planê seferanê tayê xetan vurnayî ke komresî xurt bikera, wextê raywanîye kilm bikera, hewceyîyanê resî hîna rind temîn bikera, berdarîya seferan zêde bikera, konforê xizmetanê komresî berz bikera û trafîkê şaristanî rehet bikera.

Serekîya Daîreya Resî, çarçewaya Plankerdişê Optîmîzasyonê Xetanê Komresî de rayîranê xetanê B4, Y3, AY, Z4, E11, Z2, E10, Z7 û B3yî de vurnayîş û rewîzyon kerd.

Xeta B4 do mabênê Oglakli û Balikçilarbaşi de bixebitîyo

Xeta B4 do bi 4 wesayîtan mabênê Oglakli û Balikçilarbaşi de xizmet bido. Wesayîtê ke do Oglakli ra hereket bikerê, do Taxa Bagcilarî, Alay û Şehîtlîkî ra vîyarê û biresê Balikçilarbaşi.

Hûmara seferanê xeta Y3î ameye zêdekerdene

Xeta Y3 do bi 8 wesayîtan mabênê Oglakli û Berê Koyî de xizmet bido. Rayîro newe yê xete do Rayîrê Sêwregi yo Kehen, Goristanê Yenîkoyî, Bulwarê Medîne, Hatboyu, Ofîs û Berê Koyî bo. Wextê seferanê wesayîtan ame kilmkerdene û hûmara seferan ameye zêdekerdene.

Xeta AY do sey ekspres xizmet bido

Xeta AY do şewra mabênê saetanê 07.00-09.00 de, teştare ra dima zî mabênê saetanê 15.00-18.00 de bi 9 wesayîtan xizmet bido. Xeta AY ke do Rayîrê Riha teqîb bikera, do sey xeta ekspres bixebitîyo.

Xeta Z4 do mabênê Taxa Bagcilarî û unîversîte de bixebitîyo

Xeta Z4 do bi 8 wesayîtan mabênê Taxa Bagcilarî û unîversîte de xizmet bido. Rayîro ke do dingê peyênî yê Cadeyê Ehmed Kayayî ra dest pêbikero, do Goristanê Yenîkoyî, Hatboyu, Cadeyê Gevranî, Bulwarê Xarpêtî û Berê Koyî ser ra heta unîversîte dewam bikero.

Mabênê Uçkuyular û teyaragehî de rayîro newe

Xeta E11 do bi 2 wesayîtan mabênê Uçkuyular û teyaragehî de xizmet bido. Xete do rayîrê Teyarageh, Cadeyê Çewlîgî, Bulwarê Kayapinarî, Bulwarê Dîclekentî, Cadeyê Mastfiroşî, Bulwarê Necmettîn Erbakanî û Uçkuyularî de bixebitîyo.

Rayîrê xetanê Z2 û E10yî ameyî rewîzekerdene

Rayîrê xeta Z2 ame rewîzekerdene ke bi 4 wesayîtan xizmet bido. Çarçewaya serûberkerdişî de beşê şîyayîş-ameyîşî yê Çatrayîrê Newroze rayîrî ra ame vetene û xete ameye rindkerdene.

Rayîrê xeta E10yî zî ke bi 5 wesayîtan xizmet dana, ame rewîzekerdene. Bi serûberkerdişî ame amanckerdene ke berhemdarîya xizmetê xete bêra zêdekerdene.

Xeta Z7 do mabênê Nêweşxaneyê Cigêrayîşî û teyaragehî de xizmet bido

Xeta Z7 do bi 6 wesayîtan mabênê Nêweşxaneyê Cigêrayîşî û teyaragehî de xizmet bido. Bi vurnayîşê rayîrî ame amanckerdene ke hewceyîyê resî yê hemwelatîyan hîna rind bêrê temînkerdene.

Rayîrê xeta B3yî zî ame rewîzekerdene ke bi 6 wesayîtan xizmet bido û xizmetê resî ame rindkerdene.

Xetê VÎP1 û VÎP2 xizmetî ra ameyî vetene

Netîceyê erjnayîşan de ame tesbîtkerdene ke xeta VÎP1 berdar nîya û xete xizmetî ra ameye vetene. Hemwelatîyê ke xeta VÎP1 xebitnayenê, do bieşkê sey alternatîf xeta Z2yî ra îstîfade bikerê.

Ame tesbîtkerdene ke xeta VÎP2 zî berdar nîya û qerar ame dayene ke xizmetî ra bêra vetene. Hemwelatîyê ke na xete xebitnayenê, do bieşkê sey alternatîf xetanê E11 û Z7yî bixebitnê.

Amanc reso hîna konforin û resayox o

Bi serûberkerdişanê ke ameyî kerdene, yeno amanckerdene ke berdarîya xizmetî û konforê resî yê komresî bêrê zêdekerdene û hewceyîyê resî yê hemwelatîyan hîna rind bêrê temînkerdene.

Serekîya Daîreya Resî do goreyê talebanê hemwelatîyan û giranîya raywananê xetan dewam bikera ke xizmetanê komresî aver bera û rayîran rindêr bikera.