Tarîx bar beno...
⏳Bar beno...
UNESCO Dünya Mirası
10.11.2015
Bilindiği üzere, “Diyarbakır Kalesi ve Hevsel Bahçeleri Kültürel Peyzaj Alanı”, 2015 yılında UNESCO Dünya Mirası Listesi'ne kaydedilmiştir.
Kultur, Huner û Karê Komelkî

Fuarê Gurme û Tehmanê Herêmkîyan ê Mezopotamya abî: Hedefê Amedî Torra Şaristananê Afirnayoxan a UNESCO'yî ya

Hemşaredarê Şaredarîya Şaristanê Girdî Emîn Ayî ke akerdişê Fuarê Gurme û Tehmanê Herêmkîyan ê Mezopotamya yê 8. de qisey kerd, bale ante kulturê mitbaxê şaristanî yê bi hezaran serran ser o û muhîmîya keda cinîyan a pawitişê mîrasê gastronomî de ard ziwan. Ayî dîyar kerd ke ê xebitîyenê ke Amed warê gastronomî de dekewo Torra Şaristananê Afirnayoxan a UNESCO'yî.

Akerdişê Fuarê Gurme û Tehmanê Herêmkîyan ê Mezopotamya yê 8. ke do mabênê 17-22ê teşrîna peyêne de Amed de zîyaretkerdoxanê xo qebul bikero, ame kerdiş. Hemşaredarê Şaredarîya Amedî ya Şaristanê Girdî Emîn Ay, parlamenterî, hemşaredarê qezayan, endamê meclîsê DBB'yî û temsîlkaranê rêxistinanê komelê sîvîlî akerdişî de ca girewt.

‘Mitbax vîrê şaristanêk o’

Ayî va ke gastronomî tena werdan ra nîno pê, vîr û nasnameyê şaristanan ê kulturî nawneno û wina va: “Mitbax vîr, kultur û şeklê xoîfadekerdişê şaristanêk o.” Ayî îfade kerd ke Amed wayîrê mîrasêkê gastronomî yê dewlemendî yo ke rêçê kultur, ziwan û şeklanê cuye yê cîyayan tede yê û pawitiş, gandarkerdiş û resnayîşê nê mîrasî neslanê ameyoxan rê berpirsîyarîya hempar a.

Keda cinîyan bingeyê gastronomî de ya

Ayî dîyar kerd ke Şaredarîya Şaristanê Girdî seba daşinasnayîşê berhemanê herêmkîyan, gandarkerdişê tarîfanê tradîsyonîyan, qeydkerdişê berhemanê bi nîşanê cografî û piştîdayîşê berhemardoxanê herêmkîyan xebitîyena. Ayî va ke werdê tradîsyonî bi keda may û dapîran resayê ewro û cinî kiriştoxê mîrasê kulturî yê tewr muhîmî yê. Ayî îfade kerd ke fuarî de ca dayo berhemanê kooperatîfanê cinîyan ke keda cinîyan bêro dîyayîş.

Hedef: Torra Şaristananê Afirnayoxan a UNESCO'yî

Ayî va ke daşinasnayîşê Amedî ganî tena bi awanîyanê tarîxî û sûran sînordar nêmano çunke hîkayeyê şaristanî sifre, mitbax, deyîr, ziwan û cuya rojane de zî ciwîyeno. Ayî dîyar kerd ke seba ke Amed warê gastronomî de dekewo Torra Şaristananê Afirnayoxan a UNESCO'yî amadekarî kenê la verênîya înan a ke wayîrê nirxanê herêmkîyan bivejîyê, piştî bidê berhemardoxan û tarîfanê tradîsyonîyan biresnê neslanê ameyoxan.

Berhemê kooperatîfanê cinîyan yenê daşinasnayîş

Serekîya Daîreya Kultur, Huner û Karanê Komelkîyan zî fuarî de bi standê xo nirxanê şaristanî yê kulturî û berhemardişê herêmkî dana şinasnayîş. Ay badê akerdişî standan gêra ke 62 wîlayetan ra 172 fîrmayî tede ca gênê. Ayî beşdaran rê serkewtiş waşt.

Pare Bike
ALO 153Bajarê Dostê Cinîyan