Mudirîya Şûbeyê Nêweşanê Kêmpeyda û Kronîkan a Serekîya Daîreya Xizmetanê Astengdar û Pîran xebatanê xo dewam kena ke zehmetîyanê ekonomîk û komelkîyan ê nêweşanê çolyakî kêmî bikera. Na çarçewa de kolîyê xidayan ke seba nêweşanê çolyakî ameyî amadekerdiş, bi hemkarîya şaredarîyanê qezayan yenê vilakerdiş. Yeno amanckerdiş ke vilakerdiş aşma kanûne de temam bibo.

Piştîdayîşê di serran do bireso 9 hezar û 800 kolîyan

Serekê Daîreya Xizmetanê Astengdar û Pîran Anil Aslanî ke derheqê xebatan de agahî dayî, îfade kerd ke vayîya berhemanê bêglutenî ya berze bi taybetî keyeyanê kêmameyan rê zehmetî dana û bi fehmê şaredarîya komelkî nêweşanê çolyak û PKU'yî rê piştîdayîşê kolîyanê xidayan danê. Aslanî va: “Ma amanc kenê ke heta peynîya serra 2026î 7 hezar kolîyan vila bikerê. Çarçewaya nê xizmetî de ke ma serra 2025î de dest pêkerd, peynîya serra 2026î de ma do bi pêroyî 9 hezar û 800 kolîyê xidayan dayê. Ma do nê piştîdayîşan serranê ameyoxan de zêde bikerê û dewam bikerê çunke ma na mesela sey problemêkê weşîya şarî vînenê.”

‘No piştîdayîş piştî dano keyeyan’

Adîl Ataykaya ke piştîdayîşî ra îstîfade keno, dîyar kerd ke gedeyê ey, cinîya ey û maya ey nêweşê çolyakî yê û mesrefê berhemanê bêglutenî butçeya keyeyî zehmetî dano. Ataykayayî va ke piştîdayîşê dewlete yê aşmane yê teqrîben 600 TL tena hewceyîya ardî rê zî bes nîyo û wina dewam kerd: “Şaredarîya ma zî verê cû ra nê piştîdayîşî dana ma. No piştîdayîş hewceyîyanê ma pêro temam nêkeno zî seba keyeyêk piştîyêka muhîm a. Seba nê piştîdayîşan ez teşekur kena.”

Resayîşê berhemanê bêglutenî de zehmetî

Zeynepe Ece Yaran ke sinifa yewine ya lîse de teşxîsê çolyakî girewto, bale ante zehmetîya resayîşê berhemanê bêglutenî ser o û va: “Ma marketan de vînayîşê berhemanê bêglutenî de zehmetî ancenê. Zaf weş o ke no piştîdayîşê Şaredarîya Şaristanê Girdî reseno ma. Zaf feydeyê ci ma rê beno.”