Şaredarîya Amedî ya Şaristanê Girdî, xebatanê xo yê seba piştîdayîşê prosesanê perwerdeyî yê astengdaran dewam kena. Mudirîya Şûbeyê Astengdaran a Serekîya Daîreya Xizmetanê Astengdar û Pîran, verê serra perwerde û wendişî ya newîye xebata piştîdayîşê kirtasîyeyî kerde. Çarçewaya xebate de 70 wendekaranê astengdaran rê ke merkezanê girêdayeyê mudirîye ra xizmet gênê û perwerdeyê fermî dewam kenê , malzemeyê kirtasîyeyî ameyî resnayene ke çenteyê dibistanî, defter û setê qeleman ra yenê pê.

'Xebatê ma yê piştîdayîşê psîkososyalî dewam kenê'

Serekê Daîreya Xizmetanê Astengdar û Pîran Anil Aslanî derheqê xebate de agahî da û dîyar kerd ke falîyetê piştîdayîşî yê seba kesanê astengdar û pîran dewam kenê. Aslanî dîyar kerd ke binê banê serekîya daîre de Mudirîya Şûbeyê Astengdaran, Mudirîya Şûbeyê Nêweşîyanê Kêmîpeyda û Kronîkan û Mudirîya Şûbeyê Xizmetanê Pîran xizmet danê û îfade kerd ke ê xebatanê piştîdayîşê psîkososyalî dewam kenê.

Aslanî ard vîr ke piştîdayîşê seba nêweşanê çolyak, PKU û kanserî û xizmetê Taksîya Komelkî dewam kenê, Merkezê Cuya Pîyabîyayîşî û di Keyeyanê Arisîyayîşî de zî hezar û 107 gedeyan rê xizmetê piştîdayîşê psîkososyal, perwerde û perwerdeyê taybetî yenê pêşkêşkerdene.

Amanc resayîşê 220 gedeyanê astengdaran o

Aslanî derheqê çarçewaya piştîdayîşê kirtasîyeyî de va: "Ma 70 gedeyanê astengdaran rê piştîdayîşê malzemeyê kirtasîye û çenteyê dibistanî kerd ke ma ra xizmet gênê û eynî wextî de dibistane dewam kenê. Ma amanc kenê ke emser biresê bi pêroyî 220 gedeyan."

Aslanî tekîd kerd ke xebate amanc kena ke piştî bido seypêyîya firsendî ya perwerdeyî û va: "Amancê ma no yo ke ma tayê zî bo piştî bidê kêmîkerdişê neseypêyîya firsendî ya perwerdeyî. Xebatê ma yê nê hetî do zêde bibê û dewam bikerê."