Serekîya Daîreya Polîtîkayanê Cinîyan, bi amancê ke problemanê ke cuya şaristanî de rastê cinîyan yenê, înan rê cayê xo de çareserî bivîno û hişyarîya komelkî ya vera şîdetê vera cinîyan zêde bikera, Parka Newroze de kombîyayîşê cinîyan organîze kerd.

Xurtkerdişê torranê piştîpêdayîşî yeno amanckerdene

Kombîyayîşî de ke xurtkerdişê torranê piştîpêdayîşî yê cinîyan amanc keno, Sereka Daîreya Polîtîkayanê Cinîyan Ozden Gurbuz Sumer, endamê meclîsî, xebatkarê serekîya daîre û xebatkarê Merkezê Cigêrayîş û Tatbîqkerdişê Problemanê Cinîyan ê Amedî (DÎKASUM) beşdar bîyî.

Çalakî de ke metodê têkoşînê vera şîdetê vera cinîyan ameyî muzakerekerdene, çalakî de warê parke de xebatêka warî ya xurte ameye ramitene.

Xizmetê şaredarîye yê seba cinîyan ameyî îzahkerdene

Nawitişê sînevîzyonî yo taybet ke çarçewaya çalakî de ame amadekerdene, parkd de pêşkêşê hemwelatîyan bî. Standanê agahdarkerdişî de ke di cayanê cîyayan ê parke de ameyî ronayene zî, derheqê xizmetanê şêwirmendîya huqûqî, psîkolojîk û komelkî ke Şaredarîya Şaristanê Girdî pêşkêşê cinîyan kena û mekanîzmayanê muracatî de agahdarkerdişo bidetay ame kerdene.

Taleb û teklîfê cinîyan ameyî goşdarîkerdene

Cinîyê ke parke de wext vîyarnenê, yew bi yew ameyî zîyaretkerdene û qiseykerdişê yew bi yewî ameyî kerdene. Qiseykerdişan de problemê ke cuya rojane de rastê cinîyan yenê, hêvîyê înan ê îdareyê herêmkî ra û teklîfê înan ê çareserî ameyî goşdarîkerdene. Zîyaretan de cinîyan reyde materyalê agahdarkerdişî zî ameyî parekerdene.