Serekîya Daîreya Xizmetanê Dewan ke heta ewro seranserê bajarî de seba awedayîşê citekarî û temînkerdişê awa şimitişî ya waranê heywandarîye 200 golan ra zafêr awan kerdî, çarçewaya bernameyê 2026î de dest bi xebatanê berzkerdişê fonksîyonanê golan kerd.

"104 waştişê golan est ê"

Muhendîsê Zîreatî Tahir Alan ke Serekîya Daîreya Xizmetanê Dewan de xebitêno, îfade kerd ke seba serra 2026î bi pêroyî 104 waştişê golan resayî daîre. Alanî vat ke 57 hebî waştişî derheqê viraştişê golanê neweyan de yê, 47 hebî zî seba miqate, tamîr û başkerdişî yê.

Alanî îfade kerd ke projeyê golanê neweyan girêdayeyê destûranê fermî û prosesanê projekerdişî yê demdergan ê û qeyd kerd ke seba hewceyîyanê lezabezan verênî danê miqate, tamîr û başkerdişê golan ke est ê, nê prosesî ra dima do projeyanê golanê neweyan zî bikerê.

"Ma bendêko 7 metreyî awan kerd"

Alanî vat: "Zimistan de rîyê zafîya varayîşî ra, mîyanê gole de teqrîben 30 metre hîrayî şeqayîşêk qewmîyabî. Verê cû hemwelatîyanê ma bi îmkananê xo pê huye û kerpîçan bendê qickekî yo nêm metre yan yew metre awan kerdbî û cehd kerdbî ke awe bitepîşê. Ma zî sey Şaredarîya Şaristanê Girdî lez mudaxele kerd û tîya de bendêko 6-7 metre berz awan kerd. Amancê ma no yo ke hem hewceyîya awa şimitişî ya heywanan hem zî awa awedayîşê citekarî ya citekaranê ma peyda bikerê."

7 hezar heywanî golî ra îstîfade kenê

Muxtarê Taxa Kirkpinarî Yusuf Ortakayayî îfade kerd ke verê xebatan gole nêxebitîyayêne û vat ke waştişê ke resayî şaredarî, demeko kilm de cewab dî: "Ma sipas kenê Şaredarîya ma ya Şaristanê Girdî rê. Xebatî zaf rind aver şinê. Verê na xebate gola ma rijîyaye û qul bîye. Ma waştişnameyê xo da û tira ra dima şaredarîya ma hema cade hetkarîya ma kerd. Tîya ra tena 2 hezar heywanê dewa ma ney, 5 hezar heywanê dewanê cîranan zî îstîfade kenê. Ney ra teber 2 hezar doniman ra zafêr erdî zî pê na gole ma awe danê."