Meclîsê Şaredarîya Amedî ya Şaristanê Girdî, tarîfeya vayîya servîsanê wendekar û personelan ke do serra 2026-2027î de bêro bicaardiş, qebûl kerd. Vayîya servîsê wendekaran goreyê mesafeyanê kilm û dergan mabênê 2 hezar û 200 û 3 hezar û 100 lîrayan de ameyî dîyarkerdiş.

Meclîsê Şaredarîya Amedî ya Şaristanê Girdî, goreyê waştişê Serekîya Odaya Esnafan a Wesayîtanê Servîsî ya Amedî yê derheqê vayîyanê servîsê wendekar û personelan ê serra 2026-2027î de qerar da. Nuşteyê Serekîya Daîreya Resî yê tarîxê 2ê temmuze 2026î û raporê Komîsyonê Resî yê tarîxê 13ê tebaxe 2026î, kombîyayîşê Meclîsê DBByî de ke 13ê tebaxe de ame kerdiş, ameyî qiseykerdiş.

Nuşteyê Serekîya Daîreya Resî, pêserbîyayîşê Meclîsî yê tarîxê 13ê temmuze 2026î de seba etudkerdişî ame şawitiş Komîsyonê Resî. Komîsyonî waştişê derheqê vayîya servîsê wendekar û personelan de mabênê 20-24ê temmuze de erjna. Etudo ke hetê komîsyonî ra ame kerdiş, tede averşîyayîşê ekonomîkî, amortîsmanê wesayîtan û mesrefê parçeyanê cagiran, vayîyê sotemenî û tarîfeyê ke bajaranê dorûverî de yenê bicaardiş, ameyî erjnayîş. Netîceya etudî de ame tesbîtkerdiş ke qîmetê rayicî yê nikayînî bes nîyo û bicaardişê tarîfeya vayîye ya newîye ame munasibvînayîş.

Waştiş goreyê hukmanê têkilîdaran ê Qanûnê Şaredarîya Şaristanê Girdî yê bi hûmara 5216î, Qanûnê Şaredarîye yê bi hûmara 5393î û Telîmatnameyê Xebate yê Meclîsê Şaredarîye ame erjnayîş. Tarîfeya ke Komîsyonê Resî bi yewîya reyan munasib dîye, Meclîsî de ame reydayîş. Netîceya reydayîşî de tarîfeya vayîya servîsanê wendekar û personelan a serra 2026-2027î ame qebûlkerdiş.

Vayîya servîsê wendekaran

0-3 KM: 2.200 TL (Bi erzanîya wayûbirayî: 2.000 TL)

3-6 KM: 2.300 TL (Bi erzanîya wayûbirayî: 2.100 TL)

6-9 KM: 2.500 TL (Bi erzanîya wayûbirayî: 2.200 TL)

9-12 KM: 2.650 TL (Bi erzanîya wayûbirayî: 2.300 TL)

12-15 KM: 2.800 TL (Bi erzanîya wayûbirayî: 2.400 TL)

15-18 KM: 2.950 TL (Bi erzanîya wayûbirayî: 2.500 TL)

18-21 KM: 3.100 TL (Bi erzanîya wayûbirayî: 2.600 TL)

Seba her KMyî ke 21 KMyî ra vîyareno: 80 TL

Vayîya servîsê personelan

0-10 KM: 2.500 TL

10-20 KM: 3.200 TL

Seba her KMyî ke 20 KMyî ra vîyareno: 80 TL