Komxebata Polîtîkayanê Komelkî yê Herêmkîyan ke Yewîya Şaredarîyan a Tirkîya (TBB) 8-9ê teşrîna verêne 2026 de Ankara de organîze kerd, Hetkara Sekreterê Pêroyî Zerin Turk bi nameyê Şaredarîya Amedî ya Şaristanê Girdî beşdar bîye. Komxebate de rol, berpirsîyarî û kapasîteyê dezgehî yê îdareyanê herêmkîyan ê warê polîtîkaya komelkî qisey bîyî. Roja verêne de panelan de çarçewaya teorîkî ya polîtîkaya komelkî, ferqê mabênê hetkaranê komelkîyan û viraştişê polîtîkaya komelkî û parekerdişê wezîfeyan ê mabênê îdareyê merkezî û îdareyanê herêmkîyan ameyî munaqeşakerdiş.

Roja dîyine de Turk panelê bi sernameyê "Şaredarîyan ra Musayîş" de sey qiseykerdoxe ca girewt. Panel de ameyî erjnayîş ke polîtîkayê komelkî şaredarîyan de senî yenê tesbîtkerdiş û warê xizmetanê cîyayan de senî tesîr kenê. Têkilîya polîtîkayanê komelkî û warê sey park û baxçeyan, res, karanê fenî û îmarî qisey bîye.

Turke vat ke prosesê viraştişê polîtîkaya komelkî yê Şaredarîya Amedî ya Şaristanê Girdî de, doneyê ke daîreyanê Polîtîkayanê Cinîyan, Xizmetanê Komelkî û Xizmetanê Astengdar û Pîran warî ra girewtê, cayêkê înan o muhîm est o. Turke ard ziwan ke talebê ke kombîyayîşanê şarî de yenê vatiş zî rayîr danê qeraran û nê yewînî bi perspektîfêko beşdarker û rêxistinbîyayîşo asoyî taxan de xizmet danê.

Turke bale ante a ser o ke problemê hemwelatîyan zafane bi mudaxeleyê tena yew yewîne çareser nêbenê û xebata hempare ya yewînan bîya mecbûrîyet. Turke vat ke heşt serrê qeyûmî de bedilîyayîşê her game nêverdayêne ke polîtîkaya komelkî ya îstîkrarine bêra viraştiş û cêko ke ameyî wezîfe xebatan goreyê ameyoxî plan kenê. Turke îfade kerd ke kêmanîyanê çimeyan, cayan û personelan reyde zî zaf waran de xebatê hîna îstîkrarinî yenê ramitiş û tecrubeyê xo yê vera feqîrî, bêkarî û problemê pêgirêdayeyî beşdaranê komxebate reyde pare kerdî.

Çarnayox: Mehmet Olmez