Şaredarîya Bajarê Gird a Amedî semedê pêşnîyaz û waştîşanê cinîyan sero pêvînayiş bikerî Merkezê Cuya Cinîyan a kê DÎKASUMê ra giredayîyê kombîyayîşê “Têhetamayîşê Cinîyan” serrast kerd.

Serekîya Dayîreyê Cinîyan a Şaredarîya Bajarê Gird a Amedî Merkezanê Cuya Cinîyan a kê DÎKASUMê ra giredayîyê de “Têhetamayîşê Cinîyan” serrast kerd.Kombîyayîşê “Têhetamayîşê Cinîyan” a Yenîkoy,Parqê Koşuyolî,Ben û Sen û Bêre Merdînî ra xeylê cinî beşdar bî.Kombîyayîş de pêşnîyaz,waştîş û persivanê cinîyan sero pêvînayiş ame viraştene.Xebatkaranê Serekîya Dayîreyê Cinîyan derheqê persiv û waştîşanê cinîyan de not girewt.Semedê gedeyanê beşdaran zî çalakÎya boyaxkerdîşê rîyî serrast bî.

“Merkezê Cinîyan bêro zedînayiş”

Sereka Dayîreyê Cinîyan a Şaredarîya Bajarê Gird a Amedî Selda Baran aşkera kerd kê 2 serrî ra dima taxên cîya-cîya de cinîyan ra têhet ameyî û roşanê borî yê cinîyan pîroz kerdî.Baran îzeh kerd kê kombîyayîşa pêyen Yenîkoy de ame viraştene û wîna dewom kerd:”Warên xebitnayîşê cinîyan zêde yo.La dema kayûmî de xebatanê cidî çîn bî.Warên xebatê ma cinîyan a û o semed waştîşanê cinîyan semed ma zaf giring ê.Derheqê kursan de zaf çî ameyo vatiş, sey kursan Bêro padayiş ûsb. la na qalîkerdişan raşt nîyo.Ma teyna waştîş û pêşnîyazê cinîyanê xo esas gênê o semed zî kurs û xebatanê kê cinîyan wazenê bêguman dewom bikero.”

“Cinîyan rê xeylê babetan di perwerde bêro dayene”

Baran rewşe kombîyayîşan sero zî zanayîş da û “Bi taybetî kombîyayîşa Ben û Sen de bêkarî sero xeylê gerre est bî.Çi keyfo kê bêkarî teyna herema ma de nêy heme hernîgarîya ma de persivêko gird o.Na derheq de çi dest ma ra bêrê ma texsîr nêkenî.Sewbînan derheqê leymin kerdîşê dorûverî de zî xeylê gerre est bî “ vat û Baran kîfş kerd kê kursanê Merkezanê Cuya Cinîyan 28ê Hezîrane de qedînêyo û 2 aşme maben dano û aşma Îlone de zî kursan reyna dest pêbikero.Baran pêynîyê de aşkera kerd kê teyna pê kursan nêy,ma huqûq,weşî û ûsb. babetan de zî perwerde bideme cinîyanê xo û semedê helkerdîşê persivê cinîyan eke dest ma ra çîyêk bêro ma bikeme eke bimano berpirsîyarîyê şaredarîyê zî ma nê persivan biresnîme cayanê eleqeder û çareser bikerîme.