Endama Meclîsa Bajarê Mezin a Amedê (DBB) Kader Uzun Madenkuyu û Hevşaredarê Bajarê Mezin ê Wanê yê ku ji kar hat dûrxistin Abdullah Zeydan, li bajarê Strasbourgê yê Fransayê beşdarî 49emîn Civîna Giştî ya Kongreya Rêveberiyên Xwecihî û Herêmî ya Konseya Ewropayê bûn.

Madenkuyu û Zeydan di hevdîtinên xwe yên di çarçoveya civîna giştî de, geşedanên derbarê pêvajoyê de, pêkanînên qeyûman û biryarên binpêkirina mafan ên Dadgeha Mafên Mirov a Ewropayê xistin rojevê. Her wiha di hevdîtinan de mijarên têkildarî mafên çandî û civakî û bi taybetî jî zimanê zikmakî hatin gotûbêjkirin.

Hevdîtina bi Serokê Kongreyê û Raportorên Tirkiyeyê re

Madenkuyu û Zeydan, li gel Nûnerekî Konseya Ewropayê yê Partiya Wekhevî û Demokrasiyê ya Gelan (DEM Partî) Fayik Yagizay û tîma dîplomasiyê bi Serokê Kongreya Rêveberiyên Xwecihî û Herêmî yê Konseya Ewropayê Marc Cools û bi raportorên Tirkiyeyê Bryony Rudkin û David Eray re civiyan.