Şaredarîya Bajarê Girdî yê Amedî semedê ke weşîya şarî bipawo verê Roşanê Qurbanî teftîşê xidayan zedîna û kargehanê ke bê mewzuatê rotîş kenê rê zî ceza birna.

Serekîya Dayîreyê Karanê Weşîye ya Şaredarîya Girdî semedê ke weşîya şarî bipawo verê Roşanê Qurbanî teftîşê xidayan zedîna.Ekîbê şaredarîye verê Roşanê Qurbanî;qesab,firine,market û kargehan de teftîşê xidayan keno.

Ekîbanê Serekîya Dayîreyê Karanê Weşîye û Serekîya Dayîreyê Zabitayî ya Şaredarîya Girdî, Sîteyê Şîranîrotoxan a qezaya Yenîşehrî de teftîşanê xo domna û kargehî ke qemasîyê înan estê îqaz kerd.Ekîban sewbînan marketanê cayî û neteweyî de zî teftîşan kerdî û xidayanê ke tarîxa xo vîyartebî ard pêser û Ware Depokerdîşê Çopan a Qerejdaxî de îmha kerd.Hetkarê Sekreterê Pêroyî ya Şaredarîya Girdî Raşît Yalçinî û Serekê Dayîreyê Karanê Weşîye ya Şaredarîye Vahap Saçaklidirî zî tewrê teftîşan bîyî.

Hetkarê Sekreterê Pêroyî ya Şaredarîya Girdî Raşît Yalçinî aşkera kerd ke verê Roşanê Qurbanî teftîşanê xidayan semedê weşîya şarî ameyî zedînayiş û wîna dewam kerd:"Ma seba ke şar roşan di qemasîyan û xidarîyan meoncê teftîşanê xo rê giranî dayî.Ma kargehanê ke qemasîyê înan estê ewilî îqaz kenî eke nê qemasîyan temom nêbî zî ma înan rê ceza birnenê.Pêroyî yê bajarî de teftîşê xidayan dewom kenî û roşan û dimayê roşanî de zî bi ekîbanê nobedar teftîşan do dewom bikero."