Serekîya Daîreya Polîtîkayanê Cinîyan a Şaredarîya Amedî ya Şaristanê Girdî bernameyêko hîra da destpêkerdiş. Kanserê memikan dinya de 2,3 mîlyon cinîyan ser o tesîr keno. Amancê bernameyî o yo ke hişyarîya teşxîsê rewî û kontrolî zêde bibo û bi perspektîfê seypêyîya cinsîyetê komelkî resayîşê heqê weşîye asan bibo. Xebatê ke her serre teşrîna verêne de bi nameyê "Aşma Hişyarî ya Kanserê Memikan" yenê kerdiş, pê bale ancîyena muhîmîya teşxîsê rewî û hişyarî ser o.

Bername bi hemkarîya Serekîya Daîreya Karanê Weşîye û Sendîkaya Xebatkaranê Weşîye û Xizmetanê Sosyalî (SES) yeno ramitiş. Kontrolê weşîye, kombîyayîşê agahdarkerdişî û perwerdeyê pratîkî ke serê teşrîna verêne de dest pêkerd, do heta peyê aşme qezayan û taxanê dewan de dewam bikerê.

Xebatê warî do qezayan de dewam bikerê

Çarçewaya xebatanê warî de çalakîya verêne Hezro de, Çokeksu de ame kerdiş. Dima 7ê teşrîna verêne de dewa Delgurî ya Çinarî de ame kerdiş. 21ê teşrîna verêne de Çêrmûg de kontrolê weşîye û perwerdeyê pratîkî yê Muayeneyê Memikan ê Xo bi Xo (KKMM) do bêrê dayîş. Çalakîyê hişyarî 14ê teşrîna verêne de Pasûr de, 16ê teşrîna verêne de Erxenî de û 23ê teşrîna verêne de Bismil de zî do dewam bikerê.

Semînerê teşxîsê rewî do bêrê organîzekerdiş

Çarçewaya bernameyî de bi beşdarîya Doktora Pispore Derya Deniz Altintaş semînerê bi sernameyê "Kanserê Memikan de Muhîmîya Teşxîsê Rewî" do bêrê organîzekerdiş. Semînero verên do 12ê teşrîna verêne de Alî Emîrî de, semînero dîyin zî do 27ê teşrîna verêne de Merkezê Cuya Cinîyan ê Koşuyoluyî de bêro organîzekerdiş.

Resayîşê KETEM'î do bêpere bo

Şaredarîya Şaristanê Girdî xebatanê hişyarî ra teber, cinîyan rê ke taxanê dewan de ciwîyenê û wazenê mamografî bidê girewtiş, Merkezanê Teşxîsê Rewî, Kontrol û Perwerdeyê Kanserî (KETEM) ra resayîş bêpere temîn kena.

Çarnayox: Mehmet Olmez