Serekîya Daîreya Pawitiş û Kontrolê Dorûverî ya Şaredarîya Amedî ya Şaristanê Girdî verê zimistanî şaristan de xebatanê pakkerdişî yê hîrayan kena. Xebatê ke sere de TOKÎ Oglakli 17 qezayan gênê xo mîyan, amancê înan o yo ke warê cuye hîna pak û biweşî bibê. Merkezê şaristanî de bi çar şaredarîyanê qezayan reyde pakkerdiş û şutişo pêroyî ra teber, izxarayê awa varanî û zereyê lojinan zî yenê pakkerdiş.

TOKÎ Oglakli de bi 14 erebeyan û 40 personelan xebate

Ekîbanê Serekîya Daîreya Pawitiş û Kontrolê Dorûverî TOKÎ Oglakli de bi 14 erebeyan û 40 personelan xebata pakkerdişî kerde. Ekîban eşteyî arê dayî ke rayîrê serekeyî, peyarayîr, refuj, cade, verê awanîyan û erdanê vengan de bêhesab erzîyayî û pêser bîbî. Baxçeyê Mektebê Verên û Mîyanênî yê Emlak Katilimî zî ame pakkerdiş.

"Ma resayî heme waranê TOKÎ"

Mudirê Şûbeyê Eşteyanê Huşkan ê Serekîya Daîreya Pawitiş û Kontrolê Dorûverî Mehmet Baranî vat ke seba amadekarîya zimistanî xebatanê pakkerdişî TOKÎ ra dest pêkerd: "Ma bi 14 erebeyan kewtî TOKÎ û ma resayî heme waranê TOKÎ."

Baranî ard ziwan ke merkezê şaristanî de çar şaredarîyanê qezayan reyde pakkerdişê lojinan dest pêkerdo û ê wazenê goreyê waştişanê pakkerdiş û şutişî xebatanê pakkerdişî dewam bikerê. Baranî vat ke gazinê ke TOKÎ ra ameyî, înan ser o herême de xebatêka pakkerdişî ya hîraye kerda û îdareyê TOKÎ reyde qiseykerdişê înan dewam keno.

Baranî bale ante hesasîyetê hemwelatîyan ser o û venga hemwelatîyan da ke saetanê arêdayîşê çopî de baldar bibê û çopê xo meerzê.

Erebeyê hîdrostatîkî yê neweyî xebitîyenê

Şaredarîya Şaristanê Girdî seba pakkerdişê kenar û serê peyarayîran 4 erebeyê hîdrostatîkî yê neweyî kerdî zêde. Erebeyê ke dîyayî şaredarîyanê qezayan, do cadeyanê serekeyan ê tewr qelebalixan de serê sibayî saete 06.00 ra heta şan biserûber pakkerdiş bikerê. Seba nê erebeyan ke qotikê cixareyan, toz, şûşeyê petî yê qijî û eşteyê bînî peyarayîran ra arê danê, 4 personelê cinî ameyî wezîfedarkerdiş.

Çarnayox: Mehmet Olmez