Atolyeyê ke Mudirîya Şûbeyê Gedeyan a Serekîya Daîreya Xizmetanê Komelkîyan bi amancê averberdişê qabîlîyetanê gedeyan ê fikirîyayîş, persayîş û berhemardişî organîze kerdî, bi nawitgehî zîyaretkerdoxan rê abîyî. Akerdişê nawitgehî de ke Merkezê Kultur û Kongre yê Çand Amedî de xebatanê huner, felsefe û ekolojî ano têhet, Hemvatoxê Meclîsê Şaredarîya Şaristanê Girdî Ayhan Karatekîn, endamê meclîsî, serekê daîreyan, gedeyî û keyeyanê înan ca girewt.

Malzemeyê neweraxebitnayîşî bîyî eserê hunerî

Gedeyan ra Heval Azad Sarihanî qalî kerd ke înan kaxitanê xebitnayeyan ra newe ra kaxit viraşto, hemîrê kaxitî ra kaseyî viraştî û teknîkê resmê binê camî zî musayî. Sarihanî va: “Ma tena resim nêviraşt. Ma yewbînan ra persî persayî û fikrê xo pare kerdî. Na atolye de ma musayî ke wexto ke ma bi çimêko cîya ewnîyenê çîyêk ra, ma eşkenê çîyanê ke ma verê cû ferq nêkerdbî keşf bikerê.”

“Ma xoza ra pers kerd, çiminîyada û munaqeşe kerd”

Perwerdekara atolye Berîtane Tanişma dîyar kerd ke proses gedeyan reyde pîya ame ramitiş û va: “Huner tena kaxit girewtiş û xêzkerdiş nîyo. Ma zaf rey gedeyan reyde pîya xoza ra pers kerd. Ma vejîyayî xoza, ma çiminîyada, pers kerd û munaqeşe kerd. Peynî de nê berhemê şênberî bîyî eserê ma pêrune.”

Saman: Fikirîyayîş û berhemardiş zaf biqîymet ê

Serekê Daîreya Xizmetanê Komelkîyan Omer Samanî va ke atolyeya huner û ekolojî de înan berhemardişê bi malzemeyanê neweraxebitnayîşî û xebatê felsefe ardî têhet û amanc kerd ke gedeyî vurîyayîşê malzemeyan keşf bikerê. Samanî dîyar kerd ke bi nêzdîbîyayîşê Felsefeya Seba Gedeyan (P4C) kitaban ser o zî qisey kerdo û va: “Fikirîyayîş û berhemardiş. Zaf biqîymet o ke merdim sînoranê her diyan cayêk de bîyaro têhet û heme îmkananê xoza zî bixebitno. Ez hêvî kena ke nê atolyeyî bibê mizgînîya komelêkê ekolojîkî.”

Nawitgehê “Pîya Fikirîyayîş, Keşfkerdiş û Berhemardiş”î ke xebatê gedeyan ê serrêk tede yê, do di rojî zîyaretkerdoxan rê akerde bo.