Hemşaredar Emîn Ay beşdarê panelê “Vîrê Sûrî” bî ke bi hemkarîya Şaredarîya Sûrî û Komeleya Wêjekarên Kurd Merkezê Kongre yê Çand Amedî de ame organîzekerdiş. Panelî de Hemşaredara Sûrî Gulane Onkol, nuştox Veysî Ulgen û zaf nuştox, şaîr û edebîyatkaran ca girewt.

“Ganî ma qisey bikerê ke ma layiqê Sûrî yê yan ney”

Ayî va ke Sûr zerrîya Amedî yo û ganî dewlemendîya ci ya tarîxî û kulturî bêra pawitiş. Ayî îfade kerd ke Sûr înan awan nêkerdo la pawitişê nê mîrasî de berpirsîyarîyê înan ê muhîmî est ê û va: “Ganî ma qisey bikerê ke ma layiqê Sûrî yê yan ney.” Ayî bale ante ser o ke rijnayîşê Sûrî tena bi keyeyan sînordar nêmendo, kultur, ziwan û vîrê komelkî yê bi seyan serran zî bîyê hedef.

Kulturê cuya hempare

Ayî va ke Sûr tarîx de cayêk o ke şarê cîyayî û bawerîyê cîyayî tede pîya ciwîyayê û kuçeyê tengî, keyeyê kerrayênî û mîmarîyo orîjînal parçeyê nê kulturê cuya hempare yê. Ayî ard vîrî ke Sûr de kurdan ra teber suryanî, armenî, ereb û tirkmenî zî ciwîyayê û va ke no mîras ganî bi fehmê pîyaciwîyayîşê azad û aştîyane bêro pawitiş.

“Sûr ganî tena sey warêkê turîstîkî nêro erjnayîş”

Ayî va ke îdareyê herêmkî ganî pêşengîya nê xebatan bikerê û komunê cinî û ciwanan zî ganî xebatanê derheqê ameyoxê Sûrî de ca bigîrê. Ayî bale ante ser o ke xebatanê newe ra awankerdişî de ganî awanîya Sûrî ya tarîxî û nasnameyê ci yê kulturî bêrê pawitiş.

Ulgen: No şaristano veşaye yê ma yo, yê ma pêrune yo

Nuştox Veysî Ulgenî va ke Amed seba kerrayanê xo yê sûr û sîyayan tarîx de sey “Şaristano Veşaye” ameyo namekerdiş û Sûr koç, zulm û tedayan reyde zî awanîya xo ya zafziwan û zafkulture pawita. Ulgenî dîyar kerd ke prosesê pêkewtişan ê serra 2015î Sûr de rijnayîşêko gird ardo û awanîyê ke badê rijnayîşî virazîyayê nasnameyê Sûrî yê kulturî nênawnenê. Ulgenî va: “No şaristano veşaye yê ma yo, yê ma pêrune yo. Ganî ma berpirsîyarîya xo ya derheqê Sûrî de bigîrê.”

Panel bi şîîra ke Ulgenî Sûrî ser o wende, qedîya.

Tadayox: Mehmet Olmez