Şaredarîya Amedî ya Şaristanê Girdî çarçewaya Aşma Hişyarîya Kanserê Memikan de, bi beşdarîya Doktora Pispore Derya Deniz Altintaşe, Salona Konferansan a Alî Emîrî de bernameyê pêşkêşî û qiseykerdişî yê bi sernameyê “Kanserê Memikan de Muhîmîya Teşxîsê Rewî” organîze kerd. Amanc o bî ke bale biancîya muhîmîya teşxîsê rewî ser o û zanayîşo raşt vila bibo.

Bernameyî de muhîmîya teşxîsê rewî, hewcedarîya kontrolanê weşîye yê biserûberan û rolê metodanê kontrolî yê tesbîtkerdişê nêweşîye yê merheleya verêne de qisey bîyî. Altintaşe bale ante ser o ke teşxîso rew seba prosesê tedawî û îdarekerdişê nêweşîye zaf muhîm o.

Ame tekîdkerdiş ke merheleya verêne de tesbîtkerdişê kanserê memikan seba weçînayîş û serkewtişê tedawî piştî dano. Ancî ame vatiş ke ganî bedilîyayîşê memikan bêrê dîqetkerdiş, verba nîşaneyanê şikdaran de bê ereymendişî muracatê dezgehêkê weşîye bêro kerdiş û faktorê rîskî yê şexsî bêrê erjnayîş.

Qiseykerdişî de derheqê mamografî û kontrolanê kanserê memikan de xeletîyê ke sey raştî yenê zanayîş zî ameyî parekerdiş. Derheqê rolê mamografî yê tesbîtkerdişê rewî de agahî ame dayîş û ame vatiş ke emr, tarîxê nêweşîyanê keyeyî û faktorê rîskî yê şexsî seba tesbîtkerdişê metodê kontrolî muhîm ê.

Bername bi beşê pers û cewaban qedîya. Beşdaran derheqê teşxîsê rewî, mamografî û kontrolanê weşîye yê biserûberan de persê xo persayî.

Çarnayox: Mehmet Olmez