Şebekeyê awa şimitişî yê Keyeyê Komkî yê Kandiskanî nêzdîyê 20 serran verê cû ronîybi û emrê xo yê ekonomîkî temam kerdbi. Xirabîyayîşan ser o ke zaf rey bîyêne sebebê birnayîşê awe, vindîbîyayîşê awe û îsrafî, Mudirîya Pêroyî ya Îdareyê Awe û Kanalîzasyonî yê Amedî (DÎSKÎ) goreyê waştişanê welatîyan dest bi karî kerd. Cigêrayîşan ra dima qerar ame girewtene ke xeta verêne newe bibo û ekîbanê Mudirîya Şûbeyê DÎSKÎ ya Karazî ke girêdayeyê Serekîya Daîreya ya, dest bi xebate kerd.

Çarçewaya xebate de, xeta mewcûde ra rayîrêkê cîya ser o nêzdîyê 2 hezar metre şebekeyê awa şimitişî yo newe ronîyeno. Bi xeta newîye yeno amanckerdene ke xirabîyayîş, birnayîşê awe û vindîbîyayîşê awe kêmî bibê.

Xebate do nêzdîyê 10 rojan de biqedîyo

Mudirê Şûbeyê DÎSKÎ yê Karazî Îrfan Çalişkanî dîyar kerd ke xeta newîye seba hewcedarîya awa şimitişî ya hemwelatîyan ronîyena. Çalişkanî vat ke şebekeyo newe qedîyayîşî ra dima, girêdayîşê aboneyî yê her keyeyî do bibo û hûmarkerê awe do montaj bibê; plan beno ke xebate nêzdîyê 10 rojan de biqedîyo.

'Ma do bi rehetî awa xo bişimê'

Muxtarê Taxa Ambarî Osman Uruçî zî memnûnîya xo ya xebate îfade kerd. Uruçî dîyar kerd ke xeta mewcûde zaf rey xirabe bîyêne û şebekeyo newe do hewcedarîyêka muhîme ya şarê taxe temîn bikero. Uruçî da zanayene ke ê pawenê taxijî biresê awa şimitişî ya weşe û bêbirnayîşe û vat: "Ma do bi rehetî awa xo bişimê."