Serekîya Daîreya Xizmetanê Ciwan û Sporî ya Şaredarîya Amedî ya Şaristanê Girdî û Şaredarîya Erxenî, bi amancê ke piştî bida averşîyayîşê gedeyan ê spor, sosyal û zîhnî, Taxa Bagurî de Şayîya Sporî ya Gedeyan organîze kerd. Şayîye de ke gedeyan eleqeyêko girs nawit, keyeyan ra teber, Hemşaredara Şaredarîya Erxenî Birsen Azak Bayar û Hemsereka Qeza ya DEM Partî Nudem Arya Guzel zî beşdar bîyî.

Beşê sporî yê cîya-cîyayî ceribnayî

Şayîye de beşê sporî yê cîya-cîyayî yê sey futbol, voleybol, basketbol, tenîsê masa, dart, dêsê vejîyayîşî, langirt û kişike gedeyan rê ame kaykerdiş. Gedeyê ke beşdarê kayanê taximî û çalakîyanê şexsîyan bîyî, beşê sporî yê cîya-cîyayî ceribnayî û wextêko bikeyf vîyarna.

Çalakîyê perwerdekar û keyfweşî ameyî organîzekerdiş

Çalakîyanê sporî ra teber, çalakîyê perwerdekar û keyfweşî yê sey kayanê aqil û zeka, kodkerdişo robotîk, rengkerdişê rîyan û keyeyê qampîrekî ke waranê eleqe yê gedeyan ê cîya-cîyayan rê hîtab kenê zî ca girewt.

Gedeyan ke bi rayîrê kayî tecrubeyê neweyî qezenc kerdî, firsend dî ke embazanê xo reyde têkilî ronê û pîya wext bivîyarnê. Waranê çalakîye de ke piştîpêdayîş û parekerdiş vernî de bîyî, asayîşê rengînî virazîyayî. Şayîye de gedeyan rê awa fêkî, kek û awe ame îkramkerdiş.

Şayîyî do taxanê cîya-cîyayan de dewam bikerê

Şayîye ke bi amancê ke piştî bidê averşîyayîşê gedeyan ê sosyalî, kulturê sporî vila bikerê û waranê cuya sosyale yê biemnîyetan awan bikerê ame organîzekerdiş, badê beşdarîya zafe qedîyaye.

Şaredarîya Amedî ya Şaristanê Girdî, bi amancê zêdekerdişê resayîşê gedeyan ê çalakîyanê kulturî, hunerî, sporî û sosyalan, do Şayîyanê Sporî yê Gedeyan taxanê şaristanî yê cîya-cîyayan de organîze bikera.