Perwerdeyî de ke bi hemparîya Serekîya Daîreya Polîtîkayanê Cinîyan û Mudirîya Şûbeyê Gedeyan ame kerdiş, gedeyê cinîyanê ke merkezî ra îstîfade kenê, ca girewt. Perwerdeyî de derheqê talûkeyan de ke gedeyî dinyaya dîjîtale de eşkenê rastê ci bêrê, metodê înteraktîfî yê ke goreyê emr û daraxê averşîyayîşê gedeyan ê, ameyî bikarardiş.

Gedeyan rê ame îzahkerdiş ke şîdeto dîjîtal û zordarîya sîberî çi yê; derheqê tehdît û talûkeyanê cayanê dîjîtalan de agahî ame dayîş û meselaya ke wexto ke medyaya sosyale yena bikarardiş, ganî bale bêro dayîş, ameyî qiseykerdiş. Sewbîna derheqê pawitişê agahîyanê şexsîyan, nimitîya dîjîtale, awankerdişê şîfreyêka xurte û temînkerdişê emnîyetê hesabî de agahî ameyî dayîş.

Çarçewaya perwerdeyî de gedeyan rê derheqê bikarardişê hişê viraşte û teknolojîyanê dîjîtalan ê biemnîyet û bihişan de agahî ameyî parekerdiş. Rayîrê ronayîşê têkilîya biemnîyete cayê dîjîtalî de ameyî îzahkerdiş û tedbîrê ke vera talûkeyanê bikarardişê înternetî de eşkenê bêrê girewtiş, bi nimuneyan ameyî îzahkerdiş.

Perwerdeyî de bale ame antiş ke gedeyî vera şîdet, tehdît, tacîz, zordarîya sîberî yan zî her îhlalêkê heqî de ke eşkenê cayê dîjîtalî de rastê ci bêrê, tena nîyê; mekanîzmayê ke eşkenê muracatê ci bikerê, ameyî parekerdiş.