Hemşaredar Ay: Hewceyîya ma ya tewr girde a ya ke her warî de ma bibê wayîrê arşîvêko xurt
Hemşaredarê Şaredarîya Amedî ya Şaristanê Girdî Emîn Ayî merasîmê sertîfîkayan ê Kursê Dekewtişê Zanistê Etnomuzîkolojî de qisey kerd û dîyar kerd ke pawitişê kultur û hunerê kurdan de arşîvkarîye gan a û vat: “Bêşik hewceyîya ma ya tewr girde a ya ke şarêk her warî de bibo wayîrê arşîvêk ke aîdîyetê ci yê neteweyî bigîro binê garantî.”
Hemşaredar Emîn Ay beşdarê merasîmê sertîfîkayan ê kursîyeran bî ke Kursê Dekewtişê Zanistê Etnomuzîkolojî temam kerdo ke hetê Serekîya Daîreya Kultur, Huner û Karanê Komelkîyan ra ame organîzekerdiş. Merasîmî de ke Merkezê Kultur û Kongre yê Çand Amedî de ame viraştiş, Hemvatoxê Meclîsê DBB'yî Demet Ceylan û Ayhan Karatekîn, Hetkara Sekreterê Pêroyî Muhabbet Erdogmuş, Sereka Daîreya Kultur, Huner û Karanê Komelkîyan Zeynepe Yaş, perwerdekar, hunermend, kursîyer û keyeyanê înan ca girewt.
Mîraso kulturî
Merasîm bi goşdarîkerdişê dengbêjan dest pêkerd. Sereka Daîreya Kultur, Huner û Karanê Komelkîyan Zeynepe Yaş ard vîrî ke qeydê vengî yê verênî yê kurdan verê cû hetê şîrketanê muzîkî yê dinya ra ameyê kerdiş û kursîyeran ra waşt ke dima nê mîrasê kulturî şêrê.
Ay: Bingeyê her serkewtişî de kede est a
Ayî bale ante ser o ke polîtîkayê asîmîlasyonî yê vera şarê kurdan tena ziwan ney, wedarnayîşê kultur û hunerî zî kenê hedef. Ayî îfade kerd ke seserra vîyarta de bedelê girdî ameyî dayîş la seba ke arşîvêko baş nêame viraştiş hunerê kurdan, hîkaye û edebîyatê înan hetê ê bînan ra ameyî xebitnayîş û vat: “Ez hêvî kena ke nê xebatî roj bi roje hîna hîra û hîna profesyonel bêrê kerdiş.”
Badê qiseykerdişan Ayî sertîfîkayê kursîyeran dayî înan.
Kurs 3 aşmî bi kurdkî ame dayîş
Kursê Dekewtişê Zanistê Etnomuzîkolojî 3 aşmî, 12 hewteyî dewam kerd. Kurs ke hetê perwerdekar Salar Mamlî ra bi kurdkî ame dayîş, îmkan da beşdaran ke term, teorî û nêzdîbîyayîşanê bingeyinan ê zanistê etnomuzîkolojî bişinasnê. Perwerdeyan de babetê “Etnomuzîkolojî çi yo?”, “Muzîk û kultur”, “Muzîk û nasname”, “Muzîk û komel”, “Muzîk û rîtuel” û “Etnomuzîkolojî de metodê cigêrayîşî” ameyî qiseykerdiş.
