Hemşaredarê Şaredarîya Şaristanê Girdî Serra Bucak û Emîn Ay, Hemserekê Konseya Şaristanî Dîlan Aydin û Serdar Keskîn, endamê meclîsî, parlamenterî, hemşaredarê qezayan, akademîsyenî, aktîvîstî û temsîlkaranê rêxistinanê komelê sîvîlî kombîyayîşî de ca girewt ke hetê Merkezê Cigêrayîşanê Komelkî yê Dîcle (DÎTAM) û Konseya Şaristanî ya Amedî ra Salona Kombîyayîşî ya DTSO'yî de ame organîzekerdiş.

'Ganî ma pîya çareserîyanê rasyonelan virazê'

Bucake vat ke Amed bi tarîx, kultur û tradîsyonê xo yê piştîpêdayîşî şaristanêko qewetin o, la problemê kronîkî yê şaristanî zî est ê: “Ganî ma pîya cewabê na perse bigêrê ke ‘Cayêk de ke problemî kronîk bîyê, ma çira çare nêvînenê?’ û pîya çareserîyanê rasyonelan virazê.”

Bucake dîyar kerd ke tayê problemî tena bi selahîyet û îmkananê îdareyanê herêmkîyan çare nêvînenê û hukmatê merkezî waştişanê hemkarî û pêkerdişî rê cewabo bes nêdano. Bucake ard ziwan ke parlamenteran derheqê newekerdişê şaristanî de zaf rey Wezaretê Cugeh, Şaristankarî û Bedilîyayîşê Îklîmî ra randewû waşto.

'Bibê parçeyêko aktîf ê nê prosesî'

Bucake venga rêxistinanê komelê sîvîlî da ke bibê parçeyêko aktîf ê prosesî û vat: “Beşdarî seba ma tena fikirgirewtiş û abirîyayîş nîyo. Ganî ma pîya pişta nê fikran de vindê, heta peynî bipawê û pîya vengê xo vejê.”

Bucake dîyar kerd ke plankerdişê serra 2027î tena amadekarîya butçe nîyo û amancê înan tena Amedêko ke gird beno ney, Amedêko biedalet, seypêwaz, ekolojîk û azadîwazê cinîyan o.