Seba Mehdî Zanayî ke mabênê serranê 1977-1980î de wezîfeyê Serekîya Şaredarîya Amedî kerdbî û nêweşxaneyî de ke rîyê nêweşîya KOAHî ra cuya xo ra bî, Keyeyê Şînî yê Licêyijan de sersaxî yenê qebûlkerdiş.

Hemşaredara Şaredarîya Amedî ya Şaristanê Girdî Serra Bucak, Hemserekê Pêroyî yê Partîya Seypêyî û Demokrasî ya Şaran (DEM Partî) Tuncer Bakirhan, parlamenterî, hemşaredarê şaredarîyanê qezayan, temsîlkarê partîyanê sîyasîyan û rêxistinanê komelê sîvîlî reyde pîya, keyeyê sersaxî zîyaret kerd.

Zîyaretî de ke tede keyeyê Zanayan rê sersaxî ame vatiş, bale ancîya mîrasê Mehdî Zanayî ser o ke vîrê şaristanî yê Amedî û tarîxê îdareyê hermkî de verdayo.

Bakirhan: Mehdî Zana yew xoverdayîş û vindertiş o

Hemserekê Pêroyî yê DEM Partî Tuncer Bakirhanî ke sersaxî de qisey kerd, xemgînîya xo ya vindîkerdişê Mehdî Zanayî arde ziwan û dîyar kerd ke înan erjêko zaf gird vindî kerdo.

Bakirhanî bale ante ser o ke Mehdî Zana tena serekêkê şaredarîye yo ke demê vîyarteyî de wezîfe kerdo nîyo; û îfade kerd ke Zana eynî wextî de yew xoverdayîş û vindertişêko xurt temsîl keno. Qeyd kerd ke bi saya xizmetanê şaredarîye yê ke Zanayî demanê tewr zehmet û cefayînan de bi fehmê îdareyê hermkî yê demokratîkî ramitêne, Tirkîya de tarîxê îdareyanê hermkîyan de bîyo nameyêko nimûne.

Bakirhanî dîyar kerd ke Mehdî Zanayî, xoverdayîş û vindertişê xo yê Hepsxaneyê Amedî yê demê 12ê êlule ra teber, bi xizmetanê ke îdareyanê hermkîyan de ramitî zî mîrasêko muhîm verdayo. Bakirhanî ard ziwan ke Zanayî cuya xo de ziwan, nasname û kulturê xo rê wayîrîye kerda û erjêko muhîm afirnayo; û şarê kurdî, keyeyê Zanayan û wesdaranê Mehdî Zanayî rê sersaxî waşt.