Hemşaredara Şaredarîya Amedî ya Şaristanê Girdî Serra Bucak Dîlok de bernameyê “Ver bi COP31: Dîyalogê Polîtîkaya Çalakîya Îklîmî ya Herêmkîye” de qisey kerd û bale ante ser o ke ganî projeyê sîstemê asinrayîrî yê Amedî bêro caardiş.

Bucake Roniştişê Şaredaran de qisey kerd ke mêmandarîya Şaredarîya Dîlokî ya Şaristanê Girdî de ame organîzekerdiş û vat: “Ma qalê ameyoxî nêkenê, qalê ewroyî kenê.”

'Bedelê krîzî seypê vila nêbeno'

Bucake dîyar kerd ke bedelê krîzê îklîmî mabênê komel û welatan de seypê vila nêbeno û vat: “Ziwayî, varanê zafî û laserî berhemdayîşê citkarîye kêmî kenê û çimeyanê debara merdimanê dewijan tehdîd kenê. Seba ney ganî ma koçberîya îklîmî û problemanê ci pîya bigîrê dest.”

Germîye, ziwayîye û zoradayîş vera çimeyanê awe

Bucake vat ke tewr problemê îklîmî yê muhîmî yê Amedî germîya ke zêde bena û ziwayî yê û dîyar kerd ke qeyûman ra ver eşkayêne sey Dîlokî 2014 de Planê Îklîmî yê SECAPî bikewo pratîk. Bucake qalî kerd ke do di parkanê neweyan ê 500 hezar metrekareyan ra zêdeyêr biresnê şaristanî.

'Amed hedre yo seba sîstemê asinrayîrî’

Bucake ard ziwan ke sîstemê asinrayîrî projeyê şaristanî yê tewr kêmî 15 serran o û vat: “Ma na proje pêşkêşê Wezîrê Cugeh, Şaristankarîye û Bedilîyayîşê Îklîmî Murat Kurumî û Wezîrê Resî kerd. Êdî heme sebebî eşkera yê ke projeyê ma yê sîstemê asinrayîrî bêro caardiş. Şaristanê ma, îdareyê ma yê herêmkî û çimeyê fînansî yê Şaredarîya ma ya Şaristanê Girdî hedre yê.”

Bucake sewbîna dîyar kerd ke bi projeyê peyakerdişî Zereyê Sûrî do erebeyan ra bêro pakkerdiş; no proje do piştî bido pawitişê dormeyê tarîxî û weşbîyayîşê hewayî zî.