Çarçewaya zîyaretî de ke bi organîzasyonê Serekîya Daîreya Çapemenî, Weşan û Têkilîyanê Şarî ya Şaredarîya Amedî ya Şaristanê Girdî ame kerdiş, Hemşaredare Serra Bucake taleb, waştiş û problemê esnaf û hemwelatîyan cayê xo de goşdarî kerdî. Zîyaretî de Hemşaredara Şaredarîya Sûrî Gulan Onkol, Hemserekê Qeza yê Partîya Seypêyî û Demokrasî ya Şaran (DEM Partî) yê Sûrî Mehmet Acet, endamê meclîsê DBByî û serekê daîreyanê têkilîdaran Hemşaredare Bucake reyde bîyî.

Esnaf û hemwelatîyan reyde qiseykerdişo rî bi rî

Hemşaredare Bucake cayê karan ê Taxa Yîgîtçavuşî yew bi yew zîyaret kerdî û esnaf û hemwelatîyan reyde qisey kerd û derheqê taxe de taleb, waştiş û problemî goşdarî kerdî. Zîyaretî de hemwelatîyan reyde derheqê cuya şaristanî, xizmetanê şaredarîye û hewceyîyanê binawanî yê taxe de mişewre bî.

Hemşaredare Bucake erjnayîşê esnafan ê derheqê şertanê xebate û probleman de ke taxe ser o tesîr kenê, goşdarî kerdî û derheqê babetan de ke hemwelatî tira çareserî pawenê, serekanê daîreyanê têkilîdaran ra agahî girewte.

Hewceyî û problemê taxe ameyî vatiş

Hemwelatîyan xizmetê ke taxe de hewce yê, rasterast Hemşaredare Bucake û heyetî ra vatî. Qiseykerdişan de talebê kerdişê xebatanê roşnkerdişî, ronayîşê konteyneranê çopî yê cayanê ke hewce yê, viraştişê kasîsan bi amancê temînkerdişê emnîyetê trafîkî û serûberkerdişê rayîrê otobusan vejîyayî vernî.

Hemwelatîyan îfade kerd ke nê serûberkerdişî hetê asankerdişê cuya rojane, temînkerdişê pakîya dorûverî, zêdekerdişê emnîyetê trafîkî û xurtkerdişê resayîşê xizmetanê komresî ra muhîm ê.

Talebî kewtî bernameyê xebate

Heme taleb û waştişê ke esnaf û hemwelatîyan vatî, hetê yewîneyanê têkilîdaran ra ameyî qeydkerdiş ke bêrê erjnayîş. Hemşaredare Bucake dîyar kerd ke fehmê xizmetî yo ke seranserê şaristanî de bêvindertiş yeno domnayîş, Taxa Yîgîtçavuşî de zî bi qerardarî dewam keno.

Hemşaredare Bucake îfade kerd ke taleb û waştişê neweyî yê ke ameyî vatiş, kewtî bernameyê xebate yê mewcûdî yê şaredarîye û qeyd kerd ke serekîyê daîreyanê têkilîdaran do plankerdişanê xo yê warî nê hetî de aktuel bikerê û serûberkerdişanê hewceyan bi lez bîyarê meydan.

Çarnayox: Mehmet Olmez