Çarçewaya zîyaretî de ke bi organîzasyonê Serekîya Daîreya Çapemenî, Weşan û Têkilîyanê Şarî ya Şaredarîya Amedî ya Şaristanê Girdî ame kerdiş, Hemşaredara Şaredarîya Amedî ya Şaristanê Girdî Serra Bucak, Hemşaredarê Şaredarîya Kayapinarî Cengîz Dundar, Hemserekê Qeza yê Partîya Wekhetî û Demokrasîya Şaran (DEM Partî) yê Kayapinarî Mehmet Yeşîlbaş û endamanê meclîsî reyde pîya Taxa Barişî de ke girêdayeyê qezaya Kayapinarî ya, Kuçeyê 1033. de esnafî zîyaret kerdî.

Hemşaredare Bucake cayê karan ê kuçeyî yew bi yew zîyaret kerdî û esnaf û hemwelatîyan reyde qisey kerd û derheqê cuya şaristanî û xizmetanê herêmkîyan de taleb, waştiş û problemî goşdarî kerdî.

Hemwelatîyan hewceyîyê taxe vatî

Hemwelatîyan ke zîyaretî de hewceyîyê taxe Hemşaredare Bucake ra vatî, taleb kerd ke taxe rê warê parkan ê neweyî bêrê viraştiş, seferê otobusan ke do resî rehet bikerê, newe ra bêrê serûberkerdiş, xizmetê pakîye yê rutînî hîna zaf bêrê kerdiş, rayîrê serekeyî ser o xebata kasîsî bêra kerdiş ke do emnîyetê peyayan zêde bikera û kerrayê parke yê kîlîtinî yê ke deforme bîyê, bêrê newekerdiş.

Talebî ameyî notkerdiş

Hemşaredare Bucake ke heme talebê ke esnaf û hemwelatîyan neqil kerdî not kerdî, dîyar kerd ke goreyê prensîbê şaredarîya beşdar û şarbingeyine, seba ke problemê ke ameyî neqilkerdiş demêko tewr kilm de bêrê çareserkerdiş, plankerdişê hewceyî do bêrê kerdiş.

Çarnayox: Mehmet Olmez