Hemşaredarê Şaredarîya Amedî ya Şaristanê Girdî Serra Bucak û Emîn Ay beşdarê konserê Orkestraya Senfonî ya Tigrisî bîyî ke Zulfu Lîvanelî mêman bî. Konserî de ke berhemê Lîvanelîyî ameyî vatiş, mesajê aştî û wayûbirayîye ameyî dayîş.

Orkestraya Senfonî ya Tigrisî Merkezê Kultur û Kongre yê Çand Amedî de berhemê Zulfu Lîvanelîyî vatî. Hemşaredarê Şaredarîya Şaristanê Girdî Serra Bucak û Emîn Ay, Hemverfekê Meclîsê DBB'yî Demet Ceylan û Ayhan Karatekîn, parlamenterî, temsîlkarê rêxistinanê komelê sîvîlî û zaf hemwelatîyan konserî de ca girewt.

Lîvanelîyî ra mesajê aştî û wayûbirayîye

Zulfu Lîvanelîyî verê konserî qiseykerdişêko kilm kerd, keyfweşîya xo ya ameyîşê Amedî îfade kerd û mesajê aştî û wayûbirayîye da.

Hemşaredare Bucake bale ante aştî û wayûbirayîye ser o

Hemşaredare Serra Bucak bi nameyê Şaredarîya Şaristanê Girdî Lîvanelîyî rê vilî pêşkêş kerdî û waşt ke organîzasyonê winasî şaristanî de bibê wesîleyê aştî û wayûbirayîye. Bucake vat: “Ez wazena heme mêmanan rê vaja ‘Şima bixeyr ameyî’. Şima bixeyr ameyî şaristanê ma, Amedê ma. Serra vîyarte wexto ke to ma zîyaret kerdî, ma şaredarî de zaf qisey kerdbî. La ewro to na sehne de dîyayîş seba mi raşta zî şayî û rûmet o. Ez zaf bîya hîsdar, destê to weş bê. Ez hêvî kena ke ewro bi to û bi Orkestraya Senfonî ya Tigrisî derheqê wayûbirayîye, embazîye û aştî de deyîrê tewr rindî bêrê vatiş.”

Bi seyan hemwelatîyan pîya vat

Konserî de ke badê qiseykerdişan dest pêkerd, bi hewayêko keyfdar dewam kerd. Bi seyan hemwelatîyan bi yew fekî pîya vat.