Heyetê teknîkî ke çarçewaya têkilîyanê şaristananê wayûbirayan ê mabênê Şaredarîya Amedî ya Şaristanê Girdî û şaristanê Rennesî yê Fransa de ameyo Amed, pêvînayîşê xo dewam kerdî. Heyet seba ke sîstemê îdareyê eşteyanê huşkan ê Amedî ca de etud bikero, tecrubeyan pare bikero û waranê xebata hempare yê mabênê her di şaredarîyan bierjno ameyo şaristanî; badê etudanê warî hemşaredaranê Şaredarîya Şaristanê Girdî Serra Bucak û Emîn Ayî reyde ame têhet.

Heyetê ke Îdarekarê Departmanê Têkilîyanê Mîyanneteweyî yê Şaredarîya Rennesî Simon Letonturier, Îdarekara Departmanê Îdareyê Eşteyan Marie Neuschwander û Berpirsîyarê Tesîsan û Newe ra Bikarardişî Benoît Guigue ra ameyo meydan, awanîya xizmetî ya serekeye ya Şaredarîya Şaristanê Girdî de zîyaret kerd. Hemverfekê Meclîsî Demet Ceylan û Ayhan Karatekîn, Hetkara Sekreterê Pêroyî Zerin Turk û serekê daîreya eleqedare zî beşdarê zîyaretî bîyî.

Projeyê hemparî ameyî erjnayîş

Zîyaretî de têkoşînê vera bedilîyayîşê îklîmî, îdareyo ekolojîk ê eşteyan, neweraqezenckerdiş û newe ra bikarardişî ser o qisey bî. Projeyê hemparî ameyî erjnayîş ke mabênê her di şaristanan de nê waran de eşkenê bêrê ramitiş û derheqê waranê xebata hempare de ke eşkenê aver şêrê, mişewre bî.

Çarnayox: Mehmet Olmez