Komîsyonê Vernîgirewtişê Îşxalî yê Sûrî awanîya xizmetî ya Şaredarîya Amedî ya Şaristanê Girdî de konferansê çapemenîye organîze kerd. Kombîyayîşî de ke Hemşaredarê Şaredarîya Şaristanê Girdî Emîn Ay, hemşaredarê qezayan û temsîlkarê komîsyonî beşdar bîyî, xebatê hemparî raya pêroyî reyde ameyî parekerdiş.

'Ma qet nêwaşt ke hemwelatî nanê xo ra bibê'

Hemşaredara Şaredarîya Sûrî Gulan Onkol dîyar kerd ke goreyê şîkayetanê şarî, cinîyan û astengdaran hereket kenê û vat: “Amancê ma qet no nêbî ke hemwelatîyan nanê înan ra bikerê, tezgehê înan hewa bidê û bê çareserîyêka alternatîfe înan miyan de verdê.”

Projeyê bazarî yo newe seba peyakerdişê Sûrî

Onkole ard ziwan ke sebebê sînoranê selahîyetî û ê ke Heyetê Abîdeyan ra îcazet nêame girewtiş, tayê gaman de netîce nêgirewto; esnaf nêşîyo cayanê bazaranê alternatîfan ke aşmanê verênan de ameyî ronayîş. Onkole dîyar kerd ke bi çimdayîşê feqîrîya xorîne ya herême, çarçewaya polîtîkaya peyakerdişê Sûrî de projeyêko newe yê bazarê taxe yo turîstîk amade kerdo.

'Kanalê pêkerdiş û dîyalogî akerde verdîyayî'

Eşkerayîya Komîsyonê Vernîgirewtişê Îşxalî yê Sûrî de ame vatiş ke komîsyonî 5 aşman de esnafan, pêşenganê komelî, muxtaran û endamanê meclîsî reyde yew bi yew pêvînayîşî kerdî. Eşkerayîye de bale ancîya ser o ke vera provokasyonanê muhtemelan kanalê dîyalog û muzakereyî akerde verdîyayî û bi razîbîyayîşê waranê cîyayan ê komelî aştîya komelkîye ame pawitiş.