Şaredariya Bajarê Mezin, ji bo kêmkirina bandorên neyênî yên barana bi pele û bi talîzok a ku di demjimêrên sibehê de li tevahiya bajêr bandor kirî, xebat meşandin. Di xebatan de ku di bin koordînasyona Sekreterê Giştî yê Şaredariya Bajarê Mezin Serdar Bakiroglu de hatin meşandin, Midûriya Giştî ya Rêveberiya Av û Kanalîzasyonê ya Amedê (DÎSKÎ), serokatiyên daîreyan ên Parastina Jîngehê, Tenduristî, Park û Baxçe û Agirkujiyê û şaredariyên navçeyan cih girtin; li cihên ku av lê pengiyaye û lehî rabûne tavilê destwerdan hate kirin.

Tîm ji bo valakirina pengên avê ku li xaçerê û rêyan kom bûye, paqijkirina mazgalên girtî û xebatên li malên ku ji ber avgirtinê bandor bûbûn, li qadê wezîfe girtin. Tîmên zabiteyê jî piştgirî dan welatiyên ku di çûnûhatinê de zehmetî kişandin.

Destwerdan li qada berpirsiyariya Rêya Bejayî hate kirin

Midûriya Şaxa Kargêriya Cobaran a girêdayî Midûriya Giştî ya DÎSKÎyê ku li gorî texmînên baranê yên Rêveberiya Giştî ya Meteorolojiyê amadekariyên xwe pêşwext qedandibû, bi destpêkirina baranê re tîmên xwe li qadê bi cih kirin. Tîmên ku bi taybetî li ser pira xaçerê, arterên sereke û bulwarên ku di qada berpirsiyariya Rêya Bejayî de ne xebatên zêde meşandin, destwerdanî cihên ku herîna xetên valakirina ava baranê lê hêdî bûbû kirin. Li van qadan bi vîdanjêr, amûrên vekirina co û kanalê û motopompan av hate valakirin.

Li nava bajêr destwerdanî 205 xalan hate kirin

Ji bo têkoşîna li dijî bandorên barana bi pele ji aliyê DÎSKÎyê ve li navenda bajêr 30 tîm û 120 xebatkar hatin wezîfedarkirin. Di xebatan de 14 vîdanjêr, 15 pîkap, 4 kepçe û 15 motopomp hatin bikaranîn.

Tîmên Midûriya Şaxa Kargêriya Cobaran, ji demjimêrên ku baran dest pê kir ve li ser 205 xalên ku tê de av pengirî û herikîna xetên ava baranê hêdî bûbû, destwerdan kirin.

Li xetên ava baranê xebatên valakirin û paqijiyê hatin meşandin

Ji ber barana bi pele ya ku di demeke kurt de bandora xwe zêde kir, kapasîteya valakirina yekser a xetên ava baranê li hin herêman derbas bû. Ji ber ku ava ku li ser rûerdê kombûyî çûnûhatin daxist ber bandoreke neyênî, tîman bi vîdanjêr û motopompan av vala kir. Li cihên ku herikîn lê hêdî bûbû pêvajoyên vekirin û paqijkirina xetan hatin kirin û hate piştraskirin ku ava baranê ji nû ve bê valakirin.

Di tevahiya dema ku baranê bandora xwe domandî de, li xetên valakirina ava baranê û izgarayên navenda bajêr kontrolên qadê hatin kirin. Li ser pira xaçerê, arterên sereke û bulwarên ku çûnûhatin li ser wan giran e, ji bo rakirina ava ku pengirî re pêşîniyeke taybet hate dayîn. Li xalên ku destwerdan li wan hate kirin xebitîna xetan hate kontrolkirin û li qadên ku pêdivî pê hebû pêvajoyên paqijî û valakirinê hatin meşandin.

Ji ALO 153 re 322 bang gihiştin

Bi barana bi pele re ji Navenda Têkiliyê ya ALO 153 re 322 bang hatin. Li gorî pirsgirêkên ku welatiyan ragihandin, tîmên peywendîdar sewqî xalên destwerdanê hatin kirin. Bi encama xebatên koordîneyî yên serokatiyên daîreyan ên DÎSKÎ, Parastina Jîngehê û Agirkujiyê û şaredariyên navçeyan, pengên ava baranê hatin valakirin, mazgalên ku girtîbûn hatin paqijkirin û rêyên ku çûnûhatina wan ji ber kombûna avê qut bûbû ji nû ve ji seyrûseferê re hatin vekirin.

Tîmên agirkujiyê destwerdanî 90 bûyeran kirin

Tîmên Serokatiya Daîreya Agirkujiyê, li ser agahdariyên ku piştî barana bi pele hatin, destwerdanî 90 bûyeran kirin. Tîman di çarçoveya xebatên ku meşandin de ava ku li 3 mal û 22 kargehan de pengirîbû vala kir.

Welatiyên ku li qadên vekirî û di wesayîtan de asê mabûn jî ji aliyê tîmên agirkujiyê ve hatin valakirin û gihandin cihên ewle.

Piştgiriya zabiteyê ji bo welatiyên ku di çûnûhatinê de zehmetî dîtin

Ji ber şert û mercên neyênî yên hewayê, tîmên zabtiyeyê piştgiriya welatiyên ku demeke dirêj li bangehên otobêsê sekinîn û di çûnûhatinê de zehmetî dîtin kirin. Tîman welatî bi rengekî ewle gihandin cihên ku dixwestin biçinê.

Bandorên baranê dê bi daneyên qadê bên nirxandin

Serokê Şaxa Kargêriya Cobaran a DÎSKÎyê Vehbî Demîrkiran diyar kir ku barana di demeke kurt de bandora xwe zêde kir, bû sedem ku bi taybetî ava rûerdê li hin xalên diyar bipengire. Demîrkiran da zanîn ku destwerdanên di dema baranê de hatine kirin di warê nirxandina xebitîna pergala binesaziyê ya di bin şert û mercên cuda de jî daneyan peyda dike û wiha got: “Şîdeta baranê û mîqdara barana ku di demeke kurt de dibare, dikare li hin xalan kapasîteya yekser a pergala valakirinê derbas bike. Di rewşên wiha de pêşîniya me ew e ku em dabîn bikin ku ava pengiyayî bê valakirin û bandora li ser çûnûhatinê kêm bibe. Her rewşeke ku em li qadê pê re rû bi rû dimînin, ji me re dibe alîkar ku em bibînin binesazî li kîjan xalan zêdetir tengav dibe. Em van çavdêriyan bi lêkolînên teknîkî re dinirxînin û li xalên ku pêdivî pê heye hewcedariyên venêrîn, baştirkirin û zêdekirina kapasîteyê diyar dikin û destwerdanê lê dikin.”