Şaredariya Bajarê Mezin a Amedê, li gorî nirxandinên meteorolojiyê, beriya barana ku çaverê ye bibare, xebatên xwe yên pêşîlêgirtinê yên li seranserê bajêr zêde kirin. Tîmên ku bi kordînasyona Serokatiya Daîreya Parastina Jîngehê û Kontrolê hatine avakirin, bi şev mesaiyê dikin û li rêyên sereke di mazgal û şebekeyên ava baranê de xebatên paqijiyê dimeşînin.

Di xebatan de bi sedan karker ji Rêveberiya Giştî ya Îdareya Av û Kanalîzasyonê ya Amedê (DÎSKÎ) û ji Serokatiyên Daîreyên Parastina Jîngehê û Kontrolê, Park û Baxçeyan û Karên Tenduristiyê beşdar dibin. Tîm, pel, çop, ax û bermayiyên din ên ku tê heye di dema baranê de tehliyeya avê zehmet bikin, ji mazgal û şebekeyên ava baranê paqij dikin.

Tîm li tevahiya şevê li qadê ne

Tîmên ku beriya baran dest pê bike tevdîrên xwe yên pêşîlêgirtinê zêde kirin, bi taybetî li ser kuçe û bulvarên sereke yên ku trafîka wesayît û peyayan lê zêde ye rawestiyan. Xalên ku îhtimala xitimîna wan heye yek bi yek tên kontrolkirin, ji bo ku ava baranê bê navber bigehêje pergalên tehliyeyê, bermayiyên di mazgal û şebekeyan de hatine kombûn tên paqijkirin.

Bi xebata ku di saetên şevê de tê domandin, armanc ew e ku di dema baranê de rê li ber kombûna avê ya ku dibe ku li cadde û bulvaran çêbibe bê girtin û xetên ava baranê bi awayekî baştir bixebitin.

Li 4 navçeyên navendî xebata hemwext

Li navçeya Rezanê Bulvara Qamişlo, Kolana Orhan Dogan, Kolana Evrim Alataş û Bulvara Aram Tîgran; li navçeya Peyasê Kolana Nazim Hîkmet, Bulvara Fırat, Bulvara Mahabad, Kolana Abdulkadir Aksu, Kolana Peyasê û Bulvara Rihayê; li navçeya Yenîşehirê Bulvara Mehmet Akif Ersoy, Kolana Îstasyonê, Kolana Gevranê, Kolana Qişlayê û Bulvara Xarpêtê; li navçeya Sûrê jî Kolana Înonu, Kolana Turistik û Kolana Gaziyê mazgal û şebekeyên ava baranê tên paqijkirin.

Tîmên Şaredariya Bajarê Mezin, ji bo ku bandorên neyînî yên barana ku tê payîn di jiyana bajêr de çêbikin daxînin asta herî kêm, wê kontrol û xebatên xwe yên paqijiyê yên beriya baranê berdewam bikin.