Cegerxwîno ke nameyêko muhîm yê edebîyatê kurdkî ra yew o, serrgêra mergê xo yê 40. de bi aktîvîteyêk ame vîrardene.

Serekîya Daîreya Karanê Kultur û Sosyalan ya Şaredarîya Amedî ya Şaristanê Girdî, seba serrgêra mergê Şaîr û Nuştox Cegerxwînî Merkezê Kultur û Kongreyî yê ÇandAmedî de aktîvîteya vîrardişî organîze kerd. Vîrardişî de Hemşaredarê Şaredarîya Farqînî Kadrî Esen, Hemşaredarê Şaredarîya Hêni Hemdullah Demîr, Sereka Daîreya Karanê Kultur û Sosyalan Zeynep Yaş û edebîyatkar bajarî beşdar bîyî.

Program bi yew filmê ke tede parçeyê cuya Cegerxwînî ameyî pêşkêşkerdene, dest pêkerd. Dima sohbeto ke bi nameyê "Têkilîya Mabênê Edebîyat û Muzîkê Kurdkî û Hetkarîya Şîîrê Cegerxwînî Seba Muzîkê Kurdkî" bi û moderatorîya ey Sereka KASEDî Salîha Ayatay kerd, tede Nuştox Dîlawer Zeraq sey qiseykerdoxî beşdar bî.

Zeraq ke edebîyat û nuştişê kurdkî yê Cegerxwînî ser o vindert, ard vîrî ke Cegerxwînî zaf kayanê tîyatro, hîkaye, şîîr, vîrardişî û fabilî nuştî û va ke babetê nuştuşanê berhemanê ey zaf hîra yo û nê warî de o nuştoxêko zafhetî yo.

'Hunermendan rê bî îlham'

Zeraqî va ke şîîranê Cegerxwînî zaf hunermendan rê bîyê îlham û resayê zaf komê şarî û wina dewam kerd:

"Yew taybetmendîya şîîrê Cegerxwînî zî a ya ke o îmajanê xo çinî ra nêvirazeno. O edebîyatê fekkî û klasîkî ra îstîfade keno û bingehanê şîîranê xo ra unsurê neweyî virazeno û înan reyna awan keno."

'Cegerxwîn dehayêkê edebîyatî ke çekuyanê sadeyan keno gird'

Zeraqî dîyar kerd ke têkilîya mabênê muzîk û edebîyatê kurdkî binyateyin a û na têkilî îmkan dana ke ziwanê kurdkî zereyê xo de muzîkê xo bivejo meydan.

Zeraqî ke va "Cegerxwîn, şaîrêk o ke şîîranê xo de rîtmê ke aîdê komelê kurdkî yo, tepêşeno" û wina dewam kerd:

"Tayê şaîrî bi qalanê hîrayan eserê edebî xurt kenê û bin nê çekuyanê ke şuxulnenê, tede mengenê, tayê zî bi çekuyanê qijkekan afirnayîşanê xo yê edebî kenê gird û edebîyat zî paralelê ey de gird beno. Cegerxwîn wina yew şaîr o. O dehayêkê edebîyatî yo ke çekuyanê qijek û sadeyan keno gird. Mesela bi nê çekuyan 'gulfiroş'î virazeno, ge-ge zî bi înan 'Kî ne Em'î qîrreno. Cegerxwîn, îdeolojî û fikrê xo kuweno derdanê şarî û înan neqiş bi neqiş xemilneno."

Goşdarîya muzîkî

Aktîvîteya vîrardişî badê sohbetî bi vengê hunermende Dilzar ke deyîrê ke şîîranê Cegerxwînî ra ameyê bestekerdene, vatî, qedîya.