Şaredarîya Amedî ya Şaristanê Girdî, Taxa Toplu ya Çêrmûgî de pêdîyayîşê piştîpêdayîşê cinîyan viraşt û eynî wextî de bi kontrolê weşîye yê hîrayî hem torranê piştgirîya komelkîye xurt kerd hem zî resayîşê hemwelatîyan ê xizmetanê weşîye zêde kerd.

Serekîya Daîreya Polîtîkayanê Cinîyan û Serekîya Daîreya Karanê Weşîye Taxa Toplu de kontrolê weşîye viraşt. Çarçewaya bernameyî de ke hem zêdekerdişê resayîşê xizmetanê weşîye hem zî agahdarîya cinîyan a bingeyê heqan amanc keno, cinîyan reyde têkilîya rasteraste ronîyaye û xebata zafhetîye ame rayraberdene.

Hemwelatîyan rê muayeneyê doktorî, pêmawitişê tansîyon û şekerê gonî, tesbîtê gruba gonî, testê hepatît û diganîyeye û şêwirmendîya plankerdişê keyeyî cayê xo de ameyî kerdene. Hemwelatîyê ke grûba rîskî de ameyî dîyene, seba destpêkerdişê tetkîk û dermankerdişî dezgehê weşîye rê ameyî şawitene.

Badê kontrolê weşîye ekîbê Serekîya Daîreya Polîtîkayanê Cinîyan, cinîyan reyde ameyî têhet. Azadbîyayîşê cinsîyetê komelkî, şîdetê vera cinîyan û mekanîzmayê têkoşînê vera şîdetî ameyî nirxnayene. Derheqê xebatanê DÎKASUMî û mekanîzmayanê piştgirîye de agahî ameyî dayene.

Cinîyê ke aktîf beşdar bîyî, tecrubeyê xo pare kerdî û waştişê xo yê sey rayîr, binawanî, kanalîzasyon, konteynerê eşteyan û resî resnayî şaredarî.

Bername, cinîyan rê vilakerdişê setê hîjyenî ra dima temam bî.

Mehmet Olmez