Şaredarîya Amedî ya Şaristanê Girdî û Şûbeyê 2. yê DİSK/GENEL-ÎŞî Peymana Karê Pêroyî îmza bî û bi zêdebîyayîşê %18î meaşê tewr nizmî yê karkeran bî 41 hezar 800 TL.

Şaredarîya Şaristanê Girdî û Şûbeyê 2. yê Amedî yê Sendîkaya Karkeranê Xizmetanê Pêroyînan ê Tirkîya (GENEL-ÎŞ) ke girêdayeya Konfederasyonê Sendîkayanê Karkeranê Şoreşgeran (DİSK) a, seba weşkerdişê heqê karkeranê ke şîrketanê Personel û MED A.Ş. de xebitîyenê, Peymana Karê Pêroyî (TİS) ke mabênê 1ê Çeleyê 2025 û 31ê Kanûne 2027î de yo îmza kerd.

Peymane ke hetê Hemşaredaranê Şaredarîya Şaristanê Girdî Serra Bucak û Dogan Hatun û Hemserekanê Şûbeyê 2. yê GENEL-ÎŞî yê Amedî Sebahat Sever û Behçet Barutî ra ame îmzakerdene, tede zaf weşbîyayîşî ke sewîyeya ameyoxê karkeran û heqê înanê sosyalî xurt kenê ameyî kerdene. Reyna derheqê heqanê sosyalan ê cinî û astengdaran de tayê vurîyayîşî ameyî kerdene.

Peymane de heqê rojane yê brutî %18 ameyo zêdekerdene û tewr nizm meaşê karkeran vejîya 41 hezar 800 TL. Destekê îkramîye ke her serre karkeran rê yeno dayene 2 ra bî 4 û seba paketê sosyalî zî %20 zêdebîyayîş ame kerdene.

Peymane de, vurîyayîşê ke seypêyîya cinsîyetê komelkî û heqanê cinîyan ser o yê zî est ê. Qerar ame dayene ke 8ê Adare Roja Cinîyan a Dinya û 25ê Teşrîna verêne Roja Têkoşînê vera Şîdetê Cinîyan de cinîyê ke endamê sendîka yê destûrê îdarî bigîrê û karkerê cinî menge de yew roje destûrê rojê cinîyan bigîrê.

Reyna goreyê peymane, heme karkerê astengdarî 3ê Kanûne Roja Astengdaran a Dinya de do destûrê îdarî bêrê hesibnayene.