Şaredarîya Amedî ya Şaristanê Girdî, DÎKASUM ke seba tesbîtkerdişê problemanê cinîyan û viraştişê polîtîka û projeyan hazirîya xo kena, badê 8 serran bi merasîmêk abi.

Merasîmê akerdişî de Hemşaredara Şaredarîya Şaristanê Girdî Serra Bucak, serekê daîreyan, temsîlkarê partîyanê sîyasîyan û rêxistinê cinîyan û zaf cinîyî beşdar bîyî.

Sereka Daîreya Xizmetê Cinî û Keyeyî Ozden Sumer Gurbuz va ke ê do destpêkêko newe bikerê û DÎKASUM tena seba Amedî nê, seba herême zaf muhîm o.

Hemşaredare Bucak beyanatê xo de va ke "Na roje ra dima tîya do bibo keye û welatê heme cinîyan" û derheqê qeyyûmî de va ke cinîyî qet qebul nêkenê û do heqê xo bipawê.

Qiseykerdişan ra dima bi tîlîlî û govende, Bucak û cinîyî kordelaya akerdişî birnaye û dima DÎKASUM akerd.