Şaredarîya Amedî ya Bajarê Girdî, rayîrê 500 Evler, Taxa Pirinçlikî û TOKÎya Oğlaklî de 42 cayê dinganê neweyan dîyar kerdî û lewhayî montaj kerdî.

Serekîya Daîreya Resî, seba ke şarê ke Keyeyanê TOKÎ yê Erdlerzî de ciwîyenê, bieşkê bi lezgînî biresê merkezê bajarî û mexdur nêbê, xebatanê xo dewam kena.

Ekîbanê Serekîya Daîreya Resî rayîrê 500 Evler, Taxa Pirinçlikî û TOKÎya Oğlaklî de 42 cayê dinganê neweyan dîyar kerdî û lewhayî montaj kerdî. Na xebate de do şar bieşko bi asanî wasitayanê resê pêroyî ra îstîfade bikero. Badê ke xebatê peyeray û refûjî qedîyayî, ekîbî do cayanê ke ameyê tesbîtkerdene, ser o dinganê daîmîyan ronê.

Ekîbî, merkezê bajar, qeza û taxanê dewan de goreyê îhtîyacî xebatanê tesbîtkerdişê cayanê dinganê neweyan dewam kenê.