Hemşaredarê Şaredarîya Amedî ya Şaristanê Girdî Serra Bucak û Doğan Hatun, beşdarê akerdişê Rojê Kitaban ke hetê Şaredarîya Erxenî ra organîze bîyo, bîyî.

Aktîvîte, mabênê 2-5ê Gulane de Erxenî de dewam keno. Akerdişî de Serra Bucak qisey kerd û derheqê serranê verênan de qisey kerd, ke komel aktîvîteyanê kultur, huner û edebîyatî ra bê par ameyo verdayene.

Naye ra teber, aye îşaret kerde ke sey îdarekerdoxê herêmî, ê aktîvîteyê komelkî, kulturî, hunerî û ziwanî sey parçeyê çareserîya demokratîke û pîyayîya komelî vînenê.

Hemşaredare Bucak, nuştox-şaîrê Dêrsimijî Fadil Ozturk ke vizêrî cuya xo vînda kerdîbî, o zî ard xo vîrî û waşt ke Rojê Kitaban seba Erxenîjan û cinî û domanan rê bi xeyr û weşî bo.