Hemşaredara Şaredarîya Amedî ya Şaristanê Girdî Serra Bucak, Taxa Tavşantepeyî ya qezaya Baglarî de zîyaretê maya û pîyê Narîn Guran ya 8 serre ke 4 rojî yo vîndî ya, kerd.

Hemşaredara Şaredarîya Şaristanê Girdî Serra Bucak şîye Taxa Tavşantepeyî ya qezaya Baglarî ke tede xebatê cêgêrayîşî yê ke ekîbê girêdayeyê Serekîya Daîreya Îtfaye û Karê Afetan zî tede ca gênê, seba dîyayîşê Narîn Guran ya 8 serre dewam kenê. Hemşaredare Bucak ke endamanê meclîsê şaredarîye zî tey bîy, verê cû şarê ke Kursê Quranî yê taxe de kom bîbî, înan rê qisey kerd.

Hemşaredare Bucak: Ma do her tewir destegî bidê xebatanê cigêrayîşî

Bucak, dima zîyaretê maya û pîyê Narîn Guran kerd. Bucak ke maye Yuksel Guran û pî Arîf Guranî reyde qisey kerd, derheqê vîndîbîyayîşê Narîn Guran de melumatî girewtî. Bucak dîyar kerd ke ekîbê şaredarîye xebatanê cigêrayîşî de ca gênê û va ke ê do sey Şaredarîya Şaristanê Girdî her tewir destegî bidê xebatanê cigêrayîşî ke seba dîyayîşê Narîn Guran ya 8 serre dest pêkerdo.

'Waştişê ma o yo ke kênaya ma lez bireso keyeyê xo'

Bucak ke seba may û pîyê Narîn Guran sebir waşt, wina va: "Waştişê ma o yo ke kênaya ma Narîn lez bi weşîye bireso keyeyê xo."

May û pîyê Guran zî, va ke derdê înan kesî reyde çin o, 4 rojî yo ke domana înan ra qet xeberêk nêgênê û sipasîya xo hemê kesan rê kerd ke înan rê destek danê.