Kampê Ciwanan yê Gezînî ke qeraxê Gola Hazarî de yo û wextê qeyyûmî de dewrê Wezaretê Spor û Ciwanîye bîybî, Şaredarîya Amedî ya Şaristanê Girdî kamp apey girewt û dest bi xebatanê temîrkerdiş û dermankerdişî kerd.

Kampo ke Mehleya Gezîn a Qezaya Madena Xarpêtî de yo, weçînayîşî ra ver rayberîya qeyyûmî daybî Wezaretê Spor û Ciwanîye. Weçînayîşî ra dima meclîsa şaredarî bi qerarê meclîse tahsîsî betal kerd.

Xebatî mabênê tarîxanê 1-7 temmuze de yenê kerdene

Qerarî ra dima ekîbê Şaredarîya Şaristanê Girdî dest bi xebatanê temîrkerdiş û dermankerdişî kerd.

Xebate de ekîbê Serekîya Daîreya Karanê Weşîye seba melşe, kêzik, dipuşk û maran derman ame kerdene.

Tesîs 3 rojî girewte beno

Dermankerdişî ra dima seba weşîya şarî tesîs do 3 rojî girewte bimano ke weşîya şarî nêkewo talûke.