Şaredariya Bajarê Mezin a Amedê nîqaşên ku di çarçoveya Forûma Aştî û Azadiya Civakî de dihatin meşandin, bi hevdîtineke nû berdewam dike. “Sempozyûma Mafê Axaftinê: Hafizaya Civakî, Şahidî û Travma” ku bi hevkarî û piştgiriya Komeleya Xebatên Travmayê tê organîzekirin, dê di 7–8’ê Mijdarê de pêk bê.

Di roja yekem a sempozyûmê de, li Salona Konferansê ya Alî Emîrî a Şaredariya Bajarê Mezin a Amedê, dê çar panel û Rûniştina Pêşniyarên Siyasetê bên lidarxistin. Di roja duyem de jî dê Meşa Hafizayê, ku mekanên hafizayê yên bajêr tê de ne, û “Atolyeya Tiştên ku di Mejiyê Me de Mane / Tiştên ku Me Bîr Anîn” pêk bên.

Di vê hevdîtinê de ku dê du rojan berdewam bike, dê bandorên tundiya berê jiyayî, wendayan û bêdengiyên mecbûrî yên li ser giyanê ferdî û civakî werin nîqaşkirin. Bi balkişandina li ser peywendiyên di navbera hafiza, şahidî, şîn û edaletê de, armanc ew e ku çîrok û ezmûnên nehatine vegotin bi hev re werin destgirtin.

Axaftinên vekirinê

Bernameya ku di 7’ê Mijdarê de di navbera saet 09.15–09.30’an de bi qeydkirina beşdaran dest pê dike, di navbera saet 09.45–10.30’an de dê bi axaftinên vekirinê berdewam bike. Di vekirinê de Hevseroka Şaredariya Bajarê Mezin a Amedê Serra Bucak û Seroka Komeleya Xebatên Travmayê Nergîz Ozdemîr Eke dê axaftinan bikin.

Ziman, nasname û travmaya di navbera nifşan de dê werin nîqaşkirin

Panela yekem, ku dê di navbera saet 10.30–12.00’an de pêk bê, navê “Dengê Hatiye Bêdengkirin: Ziman, Nasname û Travmaya Navbera Nifşan” hildigire. Di panelê de ku sosyolog Dr. Ronayî Onen dê moderatoriya wê bike, psîkyatr û nivîskar Azad Gundercî dê gotara “Ziman, Travma û Nasname”, psîkolog Siyabend Aslan jî gotara “Ji Hêla Giyanî ve Zimanê Dayikê” pêşkêş bikin.

Dr. Jan Îlhan Kizilhan, ku psîkolog, nivîskar û pisporê psîkolojiya çandî û travmatolojiyê ye û dê bi rêya serhêl (online) beşdar bibe, dê bi navê “Gotina Hatiye Bêdengkirin, Rêça li ser Bedenê: Travmaya di Navbera Nifşan de, Hafizaya Civakî û Epîgenetîk” biaxive.

Wendakirinên bi darê zorê, bêcezabûn û şîn dê werin destgirtin

Panela “Wenda û Şahidî: Wendakirinên bi Darê Zorê, Bêcezabûn û Şîn”, ku di navbera saet 12.12–13.45’an de tê organîzekirin, dê ji aliyê pisporê xizmeta civakî Îrfan Ekîncî ve, yê ku di Şaredariya Bajarê Mezin de dixebite, bê birêvebirin.

Di panelê de parêzvana mafan Sebla Arcan dê gotara bi navê “Li Xala Sifirê Rawestîn: Di Wendakirinên bi Darê Zorê de Travma, Şîna ku Nehatiye Temamkirin û Hêza Şahidiyê” pêşkêş bike. Sekretera Jinan a Komeleya Mafên Mirovan (ÎHD) Handan Coşkun dê bi gotara “Di Veguhastina Navbera Nifşan a Şînê de Têgihîştina Şûngeh û Bedenê: Sûr”, nûropsîkolog û psîkoterapîst Masum Aydin jî bi gotara “Şînên Qedexekirî: Êşên Bêehliyet!” axaftinên xwe bikin.

Berxwedan û hafizaya jinan dê bê axaftin

Di dana nîvro de, di navbera saet 14.45–15.45’an de, dê panela “Berxwedana Jinan û Hafizaya Wê” pêk bê. Di panelê de ku moderatoriya wê ji aliyê sosyolog Dîdem Aydemir ve, yê ku di Şaredariya Bajarê Mezin de dixebite, tê kirin, şêwirmenda psîkolojîk û aktîvîsta TJA’yê Esra Kahraman dê gotara bi navê “Cografya, Beden û Zimanê Dayikê: Li Rojhilata Navîn li nav Jinên Kurd ên Hatine Koçberkirin Veguhastina Hafizayê û Mekanîzmayên Çareseriyê” pêşkêş bike.

Rojda Bedia Akkaya ji Tevgera Jinên Azad (TJA) jî dê bi gotara “Ji Jiyana bi Zextê ber bi Çareseriya Kolektîf ve: Mîrata Berxwedana Dîrokî ya Tevgera Jinên Kurd, Jiyana Komûnal û Mekanîzmayên Serederiyê yên Taybet” biaxive.

Binpêkirina mafan, hafizaya bedenî û şertên çareseriyê

Panela çaremîn a rojê, di navbera saet 16.00–17.15’an de, dê bi navê “Tiştê ku di Bedenê de Mayî: Binpêkirina Mafan, Hafizaya Bedenî û Şertên Çareseriyê” pêk bê. Moderatoriya panelê dê ji aliyê pispora xizmeta civakî Nihal Bozhan Ozbek ve, ya ku di Şaredariya Bajarê Mezin de dixebite, bê kirin.

Pisporê psîkyatriyê û parêzvanê mafên mirovan Dr. Burhanettin Kaya dê gotara “Bêdengiya ku Dibirîne û Rewşên ‘Xwediya Wê’: Ji Kirariyê ber bi Beşdariyê ve”, sosyolog û pispora travmayê Dilşen Ozden jî gotara “Li Rêça Tiştên Nehatine Gotin: Bedena ku Biaxive” pêşkêş bikin. Siyasetnasa ji Zanîngeha Lundê Dr. Pinar Dinç jî dê gotara bi navê “Rêçên ku di Hafizayê û Xozayê de Mane: Wêranî û Îmkanên Çareseriyê” pêşkêş bike.

Ji bo bernameyên piştgiriya herêmî dê pêşniyarên siyasetê werin pêşxistin

Rûniştina Pêşniyarên Siyasetê, ku dê di navbera saet 17.30–18.40’an de bê lidarxistin, dê bi pêşkêşiyeke kurt a Şaredariya Bajarê Mezin li ser xebatên hafizayê, mexdûrên binpêkirina mafan, kesûkarên wendayan û bernameyên piştgiriya herêmî dest pê bike.

Di rûniştinê de, ku bi hêsankariya şêwirmendê Şaredariya Bajarê Mezin Dr. Yasin Duman û psîkolog Zelal Kocakaya dê bê birêvebirin, armanc ew e ku beşdarên ji dîsîplîn û saziyên cuda nêrînên xwe parve bikin û pêşniyarên siyasetê yên ku dikarin bêne sepandin kom bikin.

Bernameya roja yekem dê di navbera saet 18.45–19.00’an de bi axaftinên girtinê bi dawî bibe. Di girtinê de Endama Desteya Rêveberiyê ya Komeleya Xebatên Travmayê, psîkologa klînîkî Gizem Uygur, endamê damezrîner ê komeleyê Dr. Azad Dildar Gundercî û Hevserokê Şaredariya Bajarê Mezin a Amedê Emîn Ay dê axaftinan bikin.

Di 8’ê Mijdarê de Meşa Hafizayê dê bê kirin

Di roja duyem a sempozyûmê de, di navbera saet 09.30–13.30’an de, dê “Meşa Hafizayê: Bîranîn, Şahidîkirin, Jibîrnekirin (Nehêlana Jibîrçûnê)” bê organîzekirin. Meşa ku di bin rêberiya Derya Bozarslan a ji Navenda Hafizaya Edalet û Rastiyê de tê çêkirin, dê ji Qada Deriyê Çiyê dest pê bike û bi rawestgehên Deriyê Sarayê, Minareya Çarling, Dêra Ermeniyan a Surp Giragos, Dêra Surp Sarkis, Abîdeya Wijdanê Hevpar û Goristana Ermeniyan berdewam bike.

Di meşê de, ku şûngehên şop li ser hafizaya pirqatî ya Amedê hiştine, dê şopên berê yên ku bi înkar, bêdengkirin, koçberkirin û wendayan şekil girtine werin destgirtin. Dê bi hev re li ser derfetên bîranîna tiştên ku tên xwestin ji bîr bibin, dîsa xuyakirina çîrokên ku hatine veşartin û xwedîderketina hafizaya civakî were rawestîn.

Bernameya roja duyem dê di navbera saet 14.30–16.00’an de bi “Atolyeya Tiştên ku di Mejiyê Me de Mane / Tiştên ku Me Bîr Anîn” berdewam bike.

Beşdarbûn bêpere ye û ji hemû kesî re vekirî ye

Di sempozyûmê de dê axaftinên panelan bi Tirkî û Kurdî bin; beşdarbûn bêpere ye û ji hemû kesî re vekirî ye. Meşa Hafizayê jî dê bi kontenjana 20 kesî pêk bê. Qeydên kesên ku dixwazin beşdarî meşê bibin, dê di 7’ê Mijdarê de li qada sempozyûmê werin girtin.