Hemşaredarê Şaredarîya Amedî ya Şaristanê Girdî Serra Bucak û Dogan Hatunî, Serekê Delegasyonê Tirkîya yê Yewîya Ewropa (YE) Sefîr Thomas Hans Ossowski reyde pêvînayîşêk kerd.

Pêvînayîşî de ke Hemşaredarê Bucak û Hatunî Anqara de kerd, meseleyê muhîmî sey prosesê demokratîkbîyayîşê Tirkîya, tetbîqatê qeyûmî, aştîya hempare û xurtkerdişê rayberîyanê herêmkîyan ser o munaqeşeyî ameyî kerdene.

Pêvînayîşî de, Hemşaredaran dîyar kerd ke destegê YE'yî seba pawitişê demokrasîya herêmkî krîtîk o û dîyar kerd ke tetbîqatê qeyûmî bawerîya şarî ya demokrasî lerznayo, la şarê kurdî têkoşînê xo yê seba cuyêka demokratîk û azad dewam keno.

Serekê Delegasyonê Tirkîya yê YE Ossowskiyî dîyar kerd ke YE piştî dana prosesê aştî yê hemparî û dîyar kerd ke tetbîqatê qeyûmî hetê YE'yî ra bale ancenê. Ossowskiyî ke pêvînayîşan de ke hetkaranê Tirkîya reyde bîyê, îfade kerd ke pawitişê demokrasîya herêmkî wayîrê muhîmîyêka hayatî yo û dîyar kerd ke eke şaredarê weçiniteyî cayê xo ra ameyî dûrîkewtene, ganî kesê ke do bêrê tayînkerdene îradeyê şarî nîşan bidê. Ossowskiyî ke bale ant erjanê demokratîkan ser o ke çarçewaya Krîterê Kopenhagî de Tirkîya ganî xurt bikero, va ke YE do no proses taqîb bikero.

Peynîya pêvînayîşî de Hemşaredaran, Ossowski û sefîrê welatanê YE'yî dawet kerdî Amed û dîyar kerd ke YE ganî nê prosesî rê destegêko aktîf bido. Hemşaredare Bucak ke ard vîrardiş ke Tirkîya hema welatêko namzed a seba YE'yî û îfade kerd ke seba ke reformê demokratîkî bêrê bicaardene û krîterê namzedî bêrê temînkerdene, YE ganî Tirkîya teşwîq bikero.

Zîyaretî de Endama Daîmî ya Meclîsî Gulay Kiliç û Serekê Daîreya Etud û Projeyan Murat Akbaşî, hemşaredaran reyde bîyî.