Hemşaredarê Amedî yê Şaristanê Girdî Serra Bucak û Dogan Hatun şîyî Qezaya Baglarî de awanîya Merkezê Weşîya Gede- Maye de etud kerd dima esnafê Cadeyê Sakarya zîyaret kerdî.

Hemşaredarê Amedî yê Şaristanê Girdî Serra Bucak û Dogan Hatun şîyî Qezaya Baglarî de awanîya Merkezê Weşîya Gede- Maye de etud kerd. Hemşaredarê Baglarî Leyla Ayaz û Sîraç Çelîk zî hemşaredaran reyde bîyî. Hemşaredaran dima esnafê Cadeyê Sakarya zîyaret kerdî.

Awanîya Merkezê Weşîya Gede-Maye ke ameybî vengkerdene, hemşaredaran hem awanê hem zî hacetê tibbî ke tede yê, etud kerdî û seba ke awanî bêra temêrkerdene, talîmat da. Temîrkerdişî ra dima do awanî reyna biba Merkezê Weşîya Gede-Maye û xîzmetê şarî bika.

Cadeyê Sakarya de zîyaretê esnafan

Hemşaredaran dima bi Hemşaredaranê Baglarî Leyla Ayaz û Sîraç Çelîkî pîya esnafê Cadeyê Sakarya zîyaret kerdî. Sekretero Pêroyî Emrullah Gorduk û hetkarê Sekreterîya Pêroyî Reşat Bakan, endamê meclîsî û serekê daîreyanê eleqedaran hemşaredaran reyde bîyî. Hemşaredaran esnafî zîyaret kerd û gazin û waştişanê înan goşdaritî.

'Wa nameyê Cadeyê Sakarya bibedilîyo'

Esnafan derheqê pakîye, asayîşê cadeyî, îşxalê peyerayîr ûsn de waştişê xo vatî û waşt ke wa nameyê Cadeyê Sakarya bêro bedilnayîş. Herinda Sakarya de nameyo ke goreyê kulturê şaristanî yo, bêro dayene.

Hemşaredarî: Ma do pîya hîna baş bibê

Hemşaredaran Cadeyê Sakarya de heme esnafî goşdarî kerdî û dîyar kerd ke do berpirsîyarîya xo bîyarê bi ca. Hemşaredaran esnafan ra waşt ke wa peyerayîran îşxal nêkê û va ke, "Wexto ke her kes berpirsyarîya xo bîyaro bi ca, ma do pîya hîna baş bibê."