Hemşaredara Şaredarîya Amedî ya Bajarê Girdî Serra Bucak, Merkezê Kultur û Kongre yê ÇandAmedî de kayê Amadeusî temaşe kerd ke ame sahnekerdene.

Kayê Amadeusî ke nuştox Pater Shaffer (Peter Şafır) nuşto û behsê hîkayeya bestekaranê namdaran Wolfgang Amadeus Mozart (Volfgang Amadeus Mozart) û Antonio Salierî (Antonyo Saliyerî) keno, Merkezê Kultur û Kongre yê ÇandAmedî de ame sahnekerdene. Hemşaredara Bajarê Girdî Bucak, beşdarê kayê Amadeusî bîye ke Selçuk Yontem û Tansu Biçerî rolê serekeyî tede kay kerdî û Amed de ame mojnayene.

Hemşaredare Bucak vilikî dîyarîyê kaykerdoxan kerdî

Hemşaredare Bucak, badê ke kay temaşe kerd, bi kaykerê rolê serekeyî Selçuk Yontemî reyde ameye têhet. Hemşaredare Bucak bi nameyê heme kaykeran vilikî dîyarîyê Selçuk Yontemî kerdî û va ke înan kayî ra zaf hes kerdo û seba performansê înan ê kayî Selçuk Yontem û kaykeran pîroz kerdî.

'Amed de cayêko xisusî yê tîyatro û sînema est o'

Bucak seba Yontemî û ekîbê ey serkewtiş waşt û wina va: "Amed de cayêko xisusî yê tîyatro û sînema est o, zaf weş o ke ma şima sey kaykeranê hostayan xo het de vînenê."

Hemşaredare Bucak reyde Hemşaredara DBB’yî ya Verêne Gultan Kişanak, Hemserekê Şaristanî yê Amedî yê DEM Partî Gulşen Ozer û Abbas Şahîn, Hetkara Sekreterê Pêroyî Zerîn Turk, serekê daîreyan û endamanê meclîsî zî kay temaşe kerd.