Hevşaredarê Bajarê Mezin ê Amedê Emîn Ay, bi banga Meclisa Jinan a DEM Partiyê û saziyên jinan, li dijî zêdebûna qetlîamên jinan û tundiya mêran a li ser jinan, ji bo parastina mafê jiyanê yê jinan û mezinkirina piştevaniyê tev li meşê bû.

Li gel Hevşaredarê Bajarê Mezin ê Amedê Emîn Ay, Hevberdevkê Meclisê Ayhan Karatekin, Hevşaredarê Bajêr ê DEM Partiyê yê Amedê Yunus Muratakan, Hevşaredarê Bajêr ê DBP'ê Ahmet Dogan, Parlamenterên DEM Partiyê Mehmet Kamaç û Serhat Eren, hevşaredarên navçeyan û gelek welatî tev li meşê bûn.

'Em ji zilamtiya ku jinê dikuje şerm dikin'

Girseya ku li pêşiya avahiya Rêxistina Navçeya Baglarê ya DEM Partiyê hat cem hev, ji wir heta Parka Qerenfîlê meşiya. Di meşa ku ji bo piştgiriya têkoşîna ku jin ji gelek salan ve dimeşînin û rûbirûbûna tundiya mêr û hilgirtina berpirsiyariyê hate lidarxistin de, pankarta "Em ji zilamtiya ku jinê dikuje şerm dikin" hate hilgirtin.

Hevşaredar Ay: Divê em ji bo azadiya jinan tevbigerin

Hevşaredar Ay piştî meşê daxuyaniyek da û diyar kir ku îro ji bo rûbirûbûna rastiyekê hatine cem hev û ji bo qetlîamên jinan û qirkirina jinan ji aliyê mêran ve cara ewil e meşek tê lidarxistin.

'Encama sîstema serdest a mêr e'

Hevşaredar Ay diyar kir ku tundiya li ser jinan û qetilkirina jinan ne sûcekî şexsî ye, belkî encama newekhevî û sîstema serdest a mêr e û got:

“Her roj li dijî jinan tundî û mirin çêdibin. Li Amedê di mehê de 4 jin hatin qetilkirin. Em her kesî bi tundî şermezar dikin. Ji bo azadiya jinan, ji bo ku jin di hemû qadên jiyanê de bi awayekî wekhev werin temsîlkirin û berpirsiyariyê bigirin ser xwe, divê em tevbigerin. Heke em bi vê berpirsiyariyê nexebitin, em ne cuda ji van hemû sûcên ku têne kirin. Bila bawerî û nêrîna kesî çi be bila bibe, divê bi vê hişmendiyê nêzîk bibin. Pêşveçûn û azadiya civakê bi azadî û pêşveçûna jinê ve girêdayî ye.”

'Di her xala dîrokê de pêşengiya têkoşînê jinan kirine'

Hevşaredar Ay da zanîn ku di civakekê de ku jin ne azad bin, azadî, refah û aştî jî ne pêkan e û got ku ji ber vê yekê li Rojhilata Navîn jî aştî ne pêkan e. Hevşaredar Ay diyar kir ku di her xala dîrokê de berxwedan û pêşengiya têkoşînê ji aliyê jinan ve hatiye kirin û berdêla wê jî jinan dane. Hevşaredar Ay destnîşan kir ku ev meşa li Amedê destpêkek e tenê û divê her kes piştevaniya xwe ya bi jinan re hê bêtir mezin bike.

Hevşaredar Ay diyar kir ku ew qetlîama jinan û tundiya li ser jinan qebûl nakin û got ku Amed bajarê evîn û bîrê ye, li van waran nirxên mirovî û nirxên civakî di bin pêşengiya jinan de pêşve diçin.

Hevşaredar Ay bi gotina ku ew ê ji bo pêşveçûna azadiya jinan hemû berpirsiyariyên ku dikevin ser milê wan pêk bînin, axaftina xwe qedand.