Hevşaredara Bajarê Mezin a Amedê Serra Bucak, bi Şaredara Kolnê Henriette Reker re hat cem hev û diyar kir ku dixwazin li ser xebatên jinan, avhewa û pirsgirêkên civakî xebateke hevpar pêk bînin.

Hevşaredara Bajarê Mezin a Amedê Serra Bucak ku beşdarî Civîna Komîteya Siyasî ya Konseya Şaredarî û Herêmên Ewropayê (CEMR) bû, li Almanyayê têkiliyên xwe didomîne. Di vê çarçoveyê de Bucak bi Şaredara Bajarê Mezin a Kolnê Henriette Reker re hevdîtinek pêk anî. Hevşaredar Bucak û Reker piştî civîna ji çapemeniyê re girtî li salona pêşwaziyê daxuyanî dan.

Daxwaza xebata hevpar a bi Şaredariya Kolnê re

Şaredara Kolnê Reker ji bo Amedê vexwendibû, Bucak jî diyar kir ku dixwazin bi Şaredariya Kolnê re li ser xebatên jinan, avhewa û pirsgirêkên civakî xebateke hevpar bikin. Reker geşedanên heyî nirxand û peyamên hevgirtinê da Hevşaredar Bucak.

Bucak piştî axaftinan seramîkên bi logoya Şaredariya Bajarê Mezin a Amedê (DBB) û pirtûkeke pirzimanî ya ku dewlemendiyên çandî yên Amedê vedibêje diyarî Rekerê kir.

Li ser navê Şaredariya Kolnê xebateke danasîna bajêr weke diyarî pêşkêşî Bucak hat kirin.