Şaredarîya Amedî ya Şaristanê Girdî ILO’yî reyde kombîyayîşêk organîze kerd û Hemşaredar Hatunî dîyar kerd ke Tirkîya de teqrîben xebatê bêqeydî %20 o, Amed de zî %40 ra vêşêr o.

Şaredarîya Amedî ya Şaristanê Girdî, Rêxistina Xebate ya Mîyannetewî (ILO) reyde îstîhdamê qeydkerdî ser o kombîyayîşêko gird organîze kerd. Kombîyayîşo ke Merkezê Kultur û Kongre yê Çand Amed de ame kerdene, tede Hemşaredarê Serra Bucak û Dogan Hatun, Dîrektorê ILO'yî yê Tirkîya Yasser Hassan û pisporê ILO'yî beşdar bîyî. Kombîyayîşî de halê cuya xebate ya Amedî, astengê strukturalî vera îstîhdamo qeydkerdî û çareserî ameyî munaqeşekerdene.

Hemşaredar Hatunî kombîyayîşî de dîyar kerd ke nifûsê Amedî 1 mîlyon 833 hezar a û %60ê nifûsî nêzdîyê 35 serrî yo la no potansîyel îstîhdamê qeydkerdî de ca nêgêno. Hemşaredarî îfade kerd ke îstîhdamê cinîyan %20 o û problemo tewr gird ê vera îstîhdamê cinîyan o yo ke xîzmetê gede, pîr û astengdara kêmî yê. Hatunî qeyd kerd ke eke qeydkerdiş çareser nêbo, kes nêeşkeno vajo na xebate goreyê heqanê însanan a.

Dîrektorê ILO'yî Yasser Hassanî va ke Amed şaristanêko gird, tarîxî û eynî wext de averşîyayîşî de şarêko beşdar o. Hassanî îfade kerd ke hedefê ILO'yî vejîyayîşê xebatan o ke her kesî rê, însanan rê munasib bibê û nê kombîyayîşî mîsalêko weş o seba nê hedefî.