Hevşaredarên Bajarê Mezin Serra Bucak û Dogan Hatun, beşdarî bernameyên Serokê ÎMM û TBB'ê Ekrem Îmamoglû û endamên Meclîsa TBB'ê yên ku li dijî tayînkirina qeyûman hatin Mêrdînê bûn.

Hevşaredarên Bajarê Mezin Serra Bucak û Dogan Hatun, li Balafirgeha Mêrdînê, pêşwazî li Serokê Şaredariya Bajarê Mezin a Stenbolê û Serokê Yekîtiya Şaredariyên Tirk (TBB) Ekrem Îmamoglu yên ku ji bo piştgiriyê bidin Hevşaredarên Bajarê Mezin ê Mêrdînê Devrîm Demîr û Ahmet Turk ên qeyûm tayînî şûna wan hatin kirin, kir. Piştre Hevserok, Şaredar Îmamoglû û kesên pê re derbasî mala Ahmet Turk a li navçeya Dêrikê bûn.

Turk: Bi siyaseta qeyûman îmkana pêkanîna demokrasiyê nîne

Piştî hevdîtina ku li mala Turk pêk hat, daxuyanî hat dayîn. Hevşaredarê Bajarê Mezin ê Mêrdînê Ahmet Turk ji ber serdanê spasiya Serokê ÎMMê Ekrem Îmamoglu û şaredarên pê re kir. Turk, diyar kir ku ew geşedanên li Tirkiyeyê bi hev re dişopînin û got ku bi polîtîkaya qeyûman ve îmkana demokrasiyê ya vî welatî nîne. Turk, destnîşan kir ku divê pêvajoyeke aştiyane pêş bikeve û got ku kesên ku ji demokrasiyê bawer dikin ji bo vê yekê têdikoşin.

Îmamoglû: Em ji bo hevgirtinê li vir in

Serokê Giştî yê ÎBB û TBB'ê Ekrem Îmamoglû diyar kir ku ew ji bo Hevşaredarên Bajarê Mezin ê Mêrdînê bibêjin 'Derbasî be' li vir in û destnîşan kir ku divê li Tirkiyeyê rêveberiyên herêmî û demokrasî bi hêz bibin. Îmamoglu, da zanîn ku dema behsa zêdekirina rayeyên rêveberiyên herêmî tê kirin, mixabin ev çend sal in rastî berovajiyê wê tên û got, “Îro behsa qeyûman û desteserkirina mafê hilbijartinê û vebijartinê dikin. Em wek TBB îro li şûna ku em li Mêrdînê, bajarê çanda qedîm, yekîtiyeke xurtir bipeyivin, behsa qeyûman dikin. Ev rewşek e ku serê me dide ber me. Rewşek e ku em pê şermezar dibin. Rewşek e ku dibe sedema windakirina îtîbara Komara Tirkiyeyê. Her yek ji me ji bo qenciya vî welatî, ji bo yekitiya welat li vir e. Edalet û demokrasî mijarên pir girîng in. Ji bo em ji van hemûyan xilas bibin, em îro li vir bi hev re ne ku li Tirkiyeyê hiqûq, yekîtî, aştî û wekheviyê ava bikin.

Serdana esnafan

Piştî daxuyaniyê Hevşaredar Bucak û Hatun, Serokê TBB'ê Îmamoglû, endamên Desteya Rêveber a TBB'ê û şandeya pê re, esnafên Mêrdînê ziyaret kirin.

Di pêşwaziyê û bernameyên ku li Mêrdînê hatin lidarxistin de endamên Lijneya Giştî ya TBBê, Sekreterê Giştî yê TBByê Suat Yildiz, Alîkarê Serokê Giştî yê Partiya Wekhevî û Demokrasiyê (DEM) Mehmet Ruştu Tiryakî, Cîgira Serokê Giştî yê Partiya Komarî ya Gel (CHP) Gul Çiftçî Bînîcî û Gokçe Gokçen, Parlamenterê CHP'ê yê Urfayê Mahmut Tanal, Wekîlê Hatayê Servet Mullaoglû û şaredar û endamên meclîsa CHP'ê beşdar bûn.