Hemşaredara Şaredarîya Amedî ya Şaristanê Girdî Serra Bucake, beşdarê 'Perwerdeyê Îdarekerdişê Dewreyê Projeyan û Resayîşê Çimeyê Fonan' ke seba personelan virazîyayo, bîye û va ke seba ke kêmaneyê awanî bêrê temamkerdiş û xebatê înovasyonî bêrê ramitene, hacetê neweyî lazim ê.

Perwerde bi hemparîya Yewîya Şaredarîyanê Tirkîya (TBB) û Yewîya Ewropa (AB) ame organîzekerdiş û di rojî rameno. Perwerde Salona Konferansî yê Elî Emîrî de dest pêkerd û mabênê serekê daîreyan û îdarekerdoxanê berzan de virazîya.

Hemşaredare Bucake va ke ê seba ke kêmaneyanê heşt serranê verênan temam bikerê û Şaredarî newe ra xo aver bero, wazenê nê çimeyanê fonan ra îstîfade bikerê. Aye va 'Ma wazenê ke şaredarîya ma hem nê kêmaneyan temam bikero hem zî nameyê bajarê ma berz bikero.'

Perwerde serekê daîreyan reyde dest pêkerd û do Merkezê Kultur û Kongre yê Çand Amedî de dewam bikero. Koordînatorê Projeyê STGM’yî Murat Ozçelebî derheqê teknîkanê hazirkerdişê projeyan û programanê hetkarîyan de melumatî dayî.