Şaredarîya Amedî ya Şaristanê Girdî, 4-8ê teşrîna peyêne 2024î de beşdarê Qahîre de Forumê Bajarê Dinya yê 12. bîye û çerçewaya Planê Enerjî û Aksîyonê Hewayî yê Dewamkerdoxî (SECAP) de xebatê ke kerdî, bajarê bînan reyde ê pare kerdî.

Sereka Daîreya Vurîyayîşê Hewayî û Eşteyê Sifirî Evîn Dînar û Sereka Tîmê SECAP Dîyarbekirî Newroz Kavak, emser beşdarê Forumê Bajarê Dinya (WUF12) ke bi temaya "Her Çî Keye ra Dest Pêkeno: Kar û Barê Herême yê Bajar û Komelê Dewamkerdoxî" paytextê Misirî Qahîre de ame organîzekerdene, bîyî.

Dînar û Kavak kombîyayîşî de ke problemê globalî senî bi çareyanê herêmîyan eşkenê bêrê çareserkerdene ser o ame vinderetene, projeyê SECAP’î ke Şaredarîya Amedî ya Şaristanê Girdî dest bi hazirkerdişê ci kerdo û demêko kilm de rayîrêko serkewtî girewto, çarçewaya nê projeyî de gamê ke şaredarî do karbonê gazê sera û adaptasyonê vurîyayîşê hewayî de bierzo, standê Peymana Şaredarîyan a Globale (GCoM) de beşdaranê mîyanneteweyîyan reyde pare kerdî.

Dînar ehemmîyetê forumî dîyar kerd û va ke seba resayîşê hedefanê globalî yê hewayî, ganî çareserîyê tesîrdarî yê herême bêrê viraştene.